由麥浚龍（Juno）及謝安琪（Kay）聯手推出的專輯《the album and the end of it》於上月已推出，而隨碟附上的QR Code所延伸的彩蛋亦於昨日（12月31日）公開。當中原來暗藏另一衍生故事短片，Juno化身成為電腦管理員兼《the album and the end of it》的忠實擁躉，短片則是專輯推出當日，他與超級大電腦的有趣對話。
談及這條短片的創作意念，Juno表示因為the album企劃在這3年已深印在樂迷的腦中，但他退後一步去看這次企劃延伸的可能性，發現其實可以有更大的版塊。Juno說：「實體專輯可以令人有實質嘅觸感，但而家digital世界盛行，喺另一層面又可以係另一個創作模式，衍生另一個故事。」基於這個想法，Juno忽發奇想，將the album由原本只是講述董折浦銘心糾纏數十年的愛情故事，變成跨越幾千年的科幻故事，而這個構想其實早在2019年Kay的演唱會中最後一幕，在歌曲〈773312〉MV中Kay化身成為機械人時已透露玄機。
在釋出的短片，表面上是電腦管理員與超級大電腦的有趣對話，但其實Juno更想談及人類與科技之間的分別。Juno說：「電腦解決問題時可以透過好多資訊解答到好多問題得出好多億個答案，例如佢可以解讀何謂愛，但佢解讀唔到心嘅改變。人類同動物獨有嘅情感，電腦係解讀唔到。不過亦有好多事情人類做唔到，電腦先做到，呢條短片係想講兩者之間嘅矛盾，所以已經超越咗純粹講故事。」Juno透露，只要重溫〈773312〉的歌詞，就會發現這根本是超級大電腦的內心獨白。
專輯《the album and the end of it》推出後反應非常熱烈，整套the album三隻未開封專輯更被炒至一萬一套。the album企劃終告結束，來到2021年，Juno希望能改變過去的創作模式：「過去冇停過創作，由電影《殭屍》到專輯《Addendum》到電影《風林火山》再回到專輯《evil is a point of view》同埋《the album》系列，再加上藝人管理工作，呢10年創作模式好豐富但冇停過，感覺好疲勞，加上之前拍攝電影整親條腰而積落嘅舊患，令到我想喺新一年改變創作方式，新一年最希望身體健康同埋快樂，同時亦祈願大家繼續為美麗而生。」
撰文：機
留言 0