杜汶澤教整肉餅撐封關：大家都係中國人？真係難聽過粗口

政府仍未完全封關，香港人心惶惶，杜汶澤就連環出文，提提大家封關重要性及影響，說到有人怕封關後影響食物輸入，他更說：「超市入面啲米，無一粒係中國嚟嘅。而豬呢啲咁普通嘅動物，就更加係全世界都有！」順便教大家整肉餅。他亦鬧爆政府：「香港政府不封關，送口罩去中國，要香港人自己四出尋找口罩，對藥房炒賣坐視不理。」說到疫情，他說：「羅馬帝國滅亡，其中一個原因，都係因為瘟疫咋！」

至於疫情來襲，他就說自己只是返過公司派利是及開會，其實時間都係做運動。太太田蕊妮則拍片教大家打坐提高免疫力。

「台行政院長蘇貞昌今天拍板，政府出資近新台幣2億元建立口罩生產線，約4到5週後，國內口罩產量將可達到每日1000萬片。 新加坡軍隊1500人日以繼夜生產口罩在2月1日前趕製520萬片口罩送給國民。 香港政府不封關，送口罩去中國，要香港人自己四出尋找口罩，對藥房炒賣坐視不理。 夠喇！ 唔好再問香港人究竟前世做錯乜嘢！ 應該問香港人今世仲打算做啲乜嘢！ 如果無中國共產黨，有反送中咩？ 如果中國同香港無關係，使乜唔封關？ 老董，六八狗，林鄭都只係帶菌者，真正嘅源頭，係中國呀！ 一國兩制？真普選？你仲信？ 香港人，醒未呀？」
 「嗱左邊嗰嚿就西班牙梅頭$88 右邊中國豬𦟌$128 話說我尋日去街市買餸，諗住買夠豬𦟌煲個湯，兼且買啲梅頭切片炒菜心，點知梅頭俾人搶曬，唯有喺街口間凍肉店買咗嚿急凍西班牙黑毛豬肉。 之後我仲買咗包「新豬肉」試吓整肉餅。 如果大家係因為驚有一日封關，所以都去超市搶嘢，我好想講，超市入面啲米，無一粒係中國嚟嘅。 而豬呢啲咁普通嘅動物，就更加係全世界都有！ 封關，可能你會發現，呢個世界冇話冇咗邊個唔得！香港冇咗中國可能更加好㖭⋯⋯ 香港人做咗百幾年殖民人，你話佢知如果有一日唔再靠人，真係連諗下都唔敢咖。 大家都係中國人？真係難聽過粗口。 不過我又好樂觀喎！ 到支爆嗰陣，嗰啲愛國嘅就會突然間企響你嗰個邊，正如所有上一代人嫌棄當年窮撚中國一樣。 羅馬帝國滅亡，其中一個原因，都係因為瘟疫咋！ We’ll see.」