《殺出個黃昏》謝賢一生只愛過5個女人　戴黑超拍床戲全因對手問題？

世代之爭是近年熱門話題，去到《殺出個黃昏》導演手上，原來靠打打殺殺都可以修補關係。電影罕有以耆英為主角，描寫昔日威風殺手因為年紀老邁要賣麵維生，更因關節問題要收爐，表面風平浪靜的他其實一直意難平，一次被舊相識重召出山，竟開啟黃昏殺手之路，遲暮老人加上被男友狠飛的妙齡少女，奇妙配搭產生意外結果。戲外謝賢一生經歷同樣精彩，由感情史到和囝囝謝霆鋒的關係，多年來依然為外界矚目。

與囝囝謝霆鋒父子關係成焦點

84歲的謝賢因為家中排行第四，多年來一直人稱「四哥」，年輕時出道幾年已成為東南亞當紅小生，由黑白片到彩色電視，見證了影視行業的變遷，近年靠綜藝節目令不少年輕觀眾重新認識他，不過曾經有評論指謝賢一生作品無數，最成功的代表作可能是囝囝謝霆鋒。

謝賢80年代與狄波拉結婚後育有一子一女，後來離婚後忙於工作，與子女關係麻麻，直至大仔跟隨爸爸步伐走入娛樂圈，但因性格反叛，經常成為新聞焦點。謝霆鋒出道不久憑《古惑仔少年激鬥篇》贏得最佳新演員，當晚返屋企便將獎項放在爸爸面前，串爆爸爸拍過幾百部電視電影又如何，他未曾攞過這種獎項。12年後，謝霆鋒憑《綫人》獲香港電影金像獎影帝，就公開在台上向爸爸道歉。「我唔知點解呢番說話哽喺心入面12年，我希望佢唔好似我咁放喺心12年。希望佢原諒呢個不知天高地厚、無禮貌嘅小朋友。要湊大一個咁難教嘅細路、每日笑面迎人，你至係最佳男主角」場面非常感動。

注重外型拍床戲堅持戴超

謝賢對自己的外貌講究，霆鋒也曾大爆自細就常常要聽老豆講穿衣原則，又曾嫌囝囝打扮唔夠型。謝賢的招牌造型數十年如一，特別紮馬尾戴黑超更是他的標誌性打扮，幾乎已經與他融為一體，他曾搞笑表示因為年輕時有睇相老師稱他眼帶桃花，所以他多年來戴超全為遮擋豔遇。在2005年拍攝《情陷夜中環》時，與張文慈拍床戲時都堅持不除黑超，超乎常理的經典畫面受到網民熱議，後來拍續集時，劇情描寫他的角色夜晚中槍倒地，即使恤衫凌亂又染血，面上一副黑超依然完好無缺，安守本份遮起他的一雙桃花眼，完全睇到四哥份人的堅持。

事隔多年，有記者追問《情陷夜中環》那幕床戲，為何堅持戴超，謝賢笑言︰「可能當時個女仔唔靚啦。（記︰張文慈喎。）太耐冇見嘞，唔知佢咩樣。」可見四哥風趣依然。

一生只認愛過5個女人

四哥年輕時迷盡東南亞女觀眾，加上敢愛敢認的性格，經常被扣上女人湯圓的帽子，不過形象風流的他卻堅稱自己一生拍拖的次數一隻手數得晒，又稱自己逢拍拖都非常專一，會用盡全力去愛另一半。四哥至今只承認有過5段戀情，分別是舊時的好拍檔玉女演員嘉玲、蕭芳芳、甄珍、狄波拉和Coco。當日跟前妻再見亦是朋友的關係成為圈中模範，但都不及與細他49年的Coco的戀情爆，雖然被外界評為「爺孫戀」，但二人拍足十幾年，即使後來分手，四哥對外仍然風度十足，稱知自己年紀大，不敢以婚書綁住對方，曾叫女友遇到好男人就離開他。