雲浩影（Cloud）日前為新歌《無以名狀的痛》拍攝MV，表示歌詞和MV故事均是其自身經歷。她說︰「今次新歌同MV都係我嘅經歷，係我一段唔開心嘅時候。年初攞完新人獎，過咗新人年，唔係好知點樣應對未知嘅將來，所以有呢首歌《無以名狀的痛》。好想藉住呢首歌話畀大家知，如果你有呢啲狀態，唔使怪責自己，因為好正常嘅，我都同你一齊去面對。」
Cloud在MV中有浸浴、嚎哭、刮痧等場面，她說︰「最難忘係刮痧，導演唔想刮痧師傅刮到我背脊紅晒，因為之後仲有鏡頭，要求佢『扮』，唔好刮出痧。咁樣對專業師傅嚟講係好大挑戰，結果都刮出少少痧，紅咗少少。其實我都有得着，佢教咗我一啲刮痧知識，例如咩顏色代表身體咩體質，獲益良多。拍浸水戲時，衣服透視程度剛剛好，效果唯美。我事前低估咗浴缸戲嘅難度，平時見人哋上水戲好靚。當日第一場就拍浸浴，我一落水個鼻就入晒水，拍咗幾次之後暈暈哋。」拍攝喊戲時，Cloud輕易流出眼淚︰「拍之前無幻想要喊咁多次，最初以為只有一場喊戲，點知今次每場戲都喊，要保持抑鬱狀態默默落淚，有難度，希望效果靚啦！」
拍攝當日臨近Cloud的生日，工作人員送上蛋糕為她提早慶祝，她亦請眾人吃下午茶。
（即時娛樂）
留言 0