MIRROR自從宣佈將於7月25起於紅館舉行一連十場演唱會《MIRROR.WE.ARE LIVE CONCERT 2022》之後，一眾MIRO已經講明要搶飛，日前CitiBank就率先進行優先訂票，瞬間掀起搶飛潮，更有「黃牛黨」獅子開大口將原價1,280港元的門票炒到44萬元，認真猖狂！去到今日就輪到虛擬銀行Mox Bank進行優先訂票，點知APP系統一直出事搞到MIRO們無法登入兼搶不到飛，引來怨聲四起。
今朝10時起去到晚上11時59分，Mox客戶可以通過APP優先預訂MIRROR演唱會門票，但有網民表示由9時45分開始Mox app已經顯示「由於演唱會優先訂票反應熱烈而導致網絡出現問題，現正全力搶修」字眼，又指如果成功載入訂票頁面並開始購票，客戶會有15分鐘處理時間，不過去到開賣一刻APP都無法登入，到下午一時多Mox方面就出Po表示門票已經全部售罄，令網民嬲上加嬲。有網民投訴成朝都無法登入，又指系統要客戶輸入卡號，但原來網民要開啟MOX APP才取得個人卡號，批評MOX APP：「咁大間公司又冇support公關又做唔到嘢。」
事後Mox方面早前已在不同社交媒體提醒客戶優先訂票前先記下賬戶資料，以便整個購買流程更暢順，之後再出Po表示「我哋完全感受到開售時大家嘅熱情，亦完全預期到門票售罄時大家嘅感受，演唱會門票始終全城熱搶，供不應求，如你未能成功搶飛，懇請體諒，並無限感激你對我哋嘅支持！ 同時演唱會優先訂票反應熱烈，以致Mox app網絡出現問題，令部份客戶暫時未能登入，我們謹此致歉。」又指Mox app及Mox Card服務現已回復正常。不過網民繼續怒插「熱咩情呀, 一肚火就有」、「內部認購晒再賣黃牛飛」、「攪四個鐘都攪唔掂個Apps, 點信你比錢你過手啦！」
