林奕匡憶兒子出生「從來冇試過咁驚」　太太李靄璣：慶幸一切雨過天晴

39歲林奕匡（Phil）於2017年與TVB前主持李靄璣（Rikko）在加拿大結婚，李靄璣於8月23日誕下兒子Darrien。李靄璣昨日（9月1日）在社交平台上載一家三口的影片，寫道：「如果不是你地（哋），我就永遠唔會知道自己人生裡錯失了什麼！」。另外在之前的帖文都有提過：「在醫院裡，好似每瞬間都有不同挑戰及難題，但亦有滿滿的感動及感恩。」、「慶幸一切都雨過天晴」。而在幸福背後，其實經歷了十多小時的擔驚受怕，林奕匡日前透露太太入產房時一波三折，直言「有一刻真係好驚BB同BB媽媽會有事」、「人生從來冇試過咁驚」。

林奕匡在社交平台寫道：「非常多謝大家所有嘅祝福！今次生B嘅過程，一波三折，有一刻我真係好驚BB同BB媽媽會有事。Rikko意志好堅強一直想順產，但今次生B過程遇上complications，經過十幾個鐘後，佢開始發燒，體溫越升越高，BB心跳率同樣地越跳越快，長時間keep住升，沒辦法之下要緊急轉做開刀手術。」

「作出決定後，幾分鐘之內就要轉去手術室，我地（哋）都未有時間去collect我地（哋）嘅thoughts，姑娘叫我喺手術室外面等候，俾Rikko入去先。我拎住醫生俾我嘅手術風險資料，自己一個喺手術室門外坐，我開始好擔心。Rikko已經捱左十幾個鐘，休息睡眠近乎零，依家仲要發燒，BB同樣地發燒，而且心跳又越跳越快。我好驚BB同媽媽會有事，人生從來冇試過咁驚。我同自己講，入到手術室我一定唔可以俾Rikko覺得我驚，我一定要堅定。跟住我用三十秒時間準備左（咗）最勵志嘅林奕匡playlist，接著姑娘就叫我入去。」

「入到手術室，同之前嘅labor room 完全唔同，同埋多左（咗）好多嘅醫護人員，佢地（哋）全部都已經準備就緒，嗰一刻我知道我只能相信咁多位嘅醫護人員，將Rikko同BB嘅生命搞妥俾佢哋，而我嘅職責就係要做最「正能量」嘅「唱歌者」，而我嘅觀眾只有一個。」

「手術期間，我依然keep住好緊張，但我繼續唔理，keep住唱歌，同Rikko傾計。正當播著「一雙手」嘅時候，突然醫護人員講左（咗）一句「佢出咗嚟」 ，突然時間好似停止一樣，我一句聲都唔敢出，等候任何BB嘅反應，10秒，15秒，跟住我見到醫護人員從紗布後面抱起BB去檢查，20秒，25秒… 突然間聽到一個喊聲，係我人生聽過令我最開心嘅聲音。知道Rikko嘅角度睇唔到BB，我俾左（咗）一個爆喊嘅眼神俾佢，再點頭。非常感激今次幫我地所有嘅醫護人員。」