陳卓賢飾演鄭伊健年輕版　與許恩怡長洲談情說愛

MIRROR成員陳卓賢（Ian）早前出席活動時透露，最近為首部主演的電影《久別重逢》配音，並透露有機會安排年底上映。戲中他飾演鄭伊健的年輕版，雖然同場戲份不多，但大讚這位前輩是大好人。今日（10月9日）電影公司正式宣佈由鄭伊健、陳卓賢、許恩怡、蔡思韵主演的電影《久別重逢》將於12月上映。

《久別重逢》是鄭伊健及陳卓賢首次合作，故事關於一位音樂人面對創作瓶頸，選擇逃避而展開的一次療癒旅程。電影由開拍至今一直保持低調，伊健剖白與Ian之間的神秘關係：「呢部戲有兩個蘇昇華，一個係年青版，另一個就有一番經歷。蘇昇華呢個角色係比較內向，出身於長洲，佢好彩地遇到一個女仔，從而令自己改變，但係因為某啲原因大家又分開咗，蘇昇華從此好似失去咗一樣嘢，然後繼續自己嘅人生。」電影女角由許恩怡（Natalie）飾演，她在片中與飾演年青版蘇昇華的Ian在長洲共渡青春歲月。

提到今次因電影而結緣，伊健大爆原來跟二人的歌手身份有密切關係：「演出蘇昇華呢個角色，同Ian有密切關係，一來大家都演同一個角色，二來大家剛好都有歌手呢個身份，加上Ian懂得樂理，好適合演創作人呢個角色。另外，今次電影搵咗我音樂上合作無間嘅好朋友陳光榮參與電影原創音樂部份及提供意見，所以拍攝時候就事半功倍。」

而飾演年青版蘇昇華的Ian則透露：「今次我嘅角色係一個好鍾意音樂，但係好似唔識其他嘢嘅人，不善言辭，唔識表達自己。將自己嘅情感同相法放晒喺音樂度，好細個就立志做一個音樂人。」Ian坦言角色或多或少有自己一部份的影子，他指：「呢個角色同自己有少少相似，大家都唔係太喜歡說話，想將自己嘅想法擺喺歌曲同旋律入面，唔係好主動好直接咁同人講出口。」

除了演出，創作上一直不遺餘力的Ian亦為電影帶來自己的音樂作品：「同導演梁禮彥有好多討論同交流，因為好多情節係需要自己參與好多，包括插曲是自己寫，當中有些情節係需要彈琴或者彈結他，由自己去諗點樣彈。」電影歌曲《Tides》由Ian身兼四職，擔任主唱、作曲、編曲，並與AP潘宇謙共同作詞。

《久別重逢》故事講述那年盛夏，少女夏文萱（許恩怡 飾）和少年蘇昇華（陳卓賢 飾）因一張唱片遇上大家。年輕的他們最想知道，這青澀的愛情能走多遠⋯⋯轉眼數十年，已成音樂人的蘇昇華（鄭伊健 飾）陷入人生低谷，逃避一切，卻在醫院偶遇重逢舊愛夏文萱（蔡思韵 飾）⋯⋯