昨日本小姐同大家細數了今季繼續玩大熱紫色的眼影,唔知啱唔啱大家心水呢?其實2018秋冬亦流行另一種顏色,就是充滿淒美感覺的楓葉紅。與上年的酒紅色不同,楓葉紅眼妝中要帶有橙、黃,畫出漸層感才算正確。
Absolute New York的Aflame眼影盤就包括了奶油黃、香檳金橙及磚紅色,完美備有深秋楓葉的元素。雖然上手有少少飛粉,不過價錢大眾化,$109就可擁有6隻顏色,而且上手非常顯色,性價比高,推薦學生及想一嘗潮流的姊妹使用。
想玩楓葉色亦可留意Kate的懷舊摩登眼影盒,RD-1優雅酒紅的深邃色偏向紅棕色,帶有復古感之餘亦更像深秋的楓葉。系列另外備有BR-1摩登棕橘,帶有些微古銅色,滲出淡淡秋意之餘更為適合我們黃皮膚人士。
閃爆聖誕派對
入手秋冬眼影的另一個重點是為了迎接聖誕節,閃閃珠光就最適合不過。MAKE UP FOR EVER的Star lit眼影盤設計得相當出色,以星河為主題,一次過奉上18隻分別擁有啞緻(Matte)、金屬(Chrome)及金屬光質感的科幻色調。老實說,本小姐起初見到青青藍藍的顏色都覺得難carry,然而上手發現因為全部偏沉色的關係,不搶眼的同時又透出閃閃星光,作為主色使用亦不算太浮誇。
已有心水眼影盤又想輕輕加入炫光效果?Giorgio Armani同樣推出了以星空為主題的系列,Eyes to kill stellar眼影霜分別以藍、紅、啡、金等6種顏色的獨立包裝示人,大家可按需要選擇款式。它的膏狀質感柔滑,易推開並上色,新手都可以輕鬆點綴佳節妝容。
眼是靈魂之窗,好多姊妹都會費盡心思,不過其實不用天天畫大眼、貼雙眼皮,按季節、心情用心選色,都可以為你加上不少分數!