今個星期MIRROR再次成為網絡話題，但不是奪下甚麼大獎，又或是演唱會Blu-ray排長龍購買等，而是其身邊助手的無禮行徑令人不吐不快，個個都加入這個盤點MIRROR助手劣行行列。
事源是一眾鏡粉，對MIRROR的官方社交平台的表現感不滿，不單沒有更新活動報道，最慘係衰喺重要日子No Show，例如MIRROR三周年正日冇出PO、橫掃頒獎禮冇提過、成員出新劇冇宣傳、成員電台訪問冇預告等，於是有人率先向花姐發公開信，希望得到適當回應。
事件曝光，花姐火速回應，管理員亦做番本業，不時更新。不過做係有做，但就晦晦氣地做，負責的小編不單隔空與鏡粉開火，仲出PO單單打打，先窒鏡粉話如果想喺社交平台睇到12子最新資訊，不如以後唔做記招只有IG發布最新料。又話如果懷念昔日啲帖文記得Cap低佢，等日後慢慢回味，每一句都有骨落地。雖然對話被公開後，花姐都有出PO致歉話將會做更好，不過更大的炸彈在後頭。
曾在個人頻道訪問花姐與姜濤的陳志雲，今個星期便拍片，講一個關於商台同事受到MIRROR助手無禮對待事件，指有同事待鏡仔做完訪問後，滿心歡喜去求合照，但同一時間其助手便惡言相向︰「你屬於邊個部門？你咁樣嚟要求影相，有冇徵求過你上司同意？」雖然陳志雲已客氣地補底，指時間太趕無法影合照是理解的，但認為工作人員無需使用不禮貌的語氣來拒絕。
經過志雲大師的加持，令原本是圈內口耳相傳的傳聞，一下子大家如獲批文，紛紛在網上你一言我一語盤點清算MIRROR的幕後團隊，而且愈數愈興奮仲開埋當事人名字，可謂一發不可收拾。不過去到這階段，花姐亦沒有再低聲下氣致歉，而是出文撐自己隊友︰「一起努力行這條艱辛之路。」
筆者入行多年，都未曾見識過如此氣焰囂張的幕後團隊，而且處事的反智程度，令人詐舌，左思右想都想不通到底這些手法從何學習得來。直至睇到近日在Netflix上架，周星馳監製的《新喜劇之王》，戲中有位過氣明星馬可（王寶強 飾），雖已人氣不再，但氣焰依然旺盛，其大嬸助手更在他出場前，預先拍掌兼大聲高叫︰「馬老師嚟喇！馬老師嚟喇！大家注意馬老師嚟喇！快啲閃開唔好湧埋嚟！」唯恐粉絲真係會埋身般。而當馬可用其歪理教演戲時，大嬸助手又會吶喊助慶︰「馬老師教戲呀！大家坐穩呀！」
種種跡象看來，似乎MIRROR這位背後的工作人員，真的是看了《新喜劇之王》，然後學會了這位大嬸的藝人管理學去管理MIRROR，完美將電影情節套落到真實生活上。既然當事人沒有打算改善其態度，或許可建議做足全部，下次MIRROR出場，都可以大叫︰「MIRROR嚟喇！MIRROR嚟喇！大家注意MIRROR嚟喇！快啲閃開唔好湧埋嚟！」至少等你講得明明白白，再有人埋身求合照，要鬧都是自討苦吃，自找的！
撰文︰余建
Facebook專頁︰https://www.facebook.com/Stupid.View
