張敬軒（軒仔）與林家謙原定上周於亞洲國際博覽館舉行的《The Perfect Match》拉闊音樂會，因軒仔患感冒致上呼吸道及聲帶嚴重發炎，延期到昨晚（18日）舉行，病癒的軒仔回復狀態，與林家謙又唱又跳，還大講有味笑話，完騷後2人齊食雪條慶功。
軒仔與林家謙以學生造型合唱歌曲《邊一個發明了ENCORE》、《百年樹木》及《聽風》，為拉闊騷掀序幕，隨後安排Serrini獻聲，向他們詢問10歲時在做什麼？此時林家謙即時「林家Mean」上身，向軒仔說：「在聽《酷愛》，你呢？你個助聽器OK嘛？」令軒仔招架不住勁尷尬：「我冇嘢補充喇，法官大人。」
當軒仔指10歲時學懂跟自己玩後什麼都玩，二人並大講有味笑話。被問到何時覺得自己長大？軒仔指由有毛開始，林家謙反問：「你細個冇毛咩？你唔係好多？你啲『海膽』！」軒仔說：「細個唔覺，大個可能食錯嘢後，生得一發不可收拾。」
其後軒仔主動提出想加入林家謙的一人公司，林家謙表示沒有人工，軒仔即道：「肉償就可以！」令台下觀眾捧腹大笑。林家謙罕有一展舞技，他亦不禁自嘲：「我覺得自己好冇廉恥，一個喺台上都夠膽跳。」
（即時娛樂）
