請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

MIRROR《Innerspace》MV水舞間起舞 成員自爆貪玩變落湯雞

MIRROR新歌《Innerspace》MV「水舞間」一幕成為熱話。(大會提供)
成員貪玩變落湯雞。(大會提供)

MIRROR新歌《Innerspace》MV推出以來大受歡迎,當中「水舞間」一幕成為熱話。早前眾成員分享拍攝這一幕的點滴,讓樂迷見識到眾人有多貪玩。

楊樂文(Lokman)與江𤒹生(Anson Kong、AK)在《Innerspace》MV成為騷肌擔當,穿背心展示強壯臂彎。為顯示優美線條,二人在埋位前狂做掌上壓。不過AK因連夜趕拍劇又再拍MV,在水中起舞時,也凍得打冷震,完成後更需要即時喝熱水。AK說:「拍親MV都好似同水分不開,繼《特登》和《REBOUND》後,今次在《Innerspace》又再濕身,但因為最近拍劇又冇乜食嘢,又畀件背心我著,我都知我不夠大隻,抵抗力差少少,仲要第3日拍到凌晨6點幾,攰都是正常,所以會覺得有少少凍。」

跳舞多年的陳瑞輝(Frankie)對於今次「水舞間」則說:「我哋跳咗咁多年舞,但在水裏面跳,好多人都是第一次,原來是非常困難,同埋好多隊友都好大力踏水。」愛乾淨的王智德(Alton)被濺得全身濕透,但未有介懷,更說:「在水上跳舞是最晚拍攝的最後一Part,但能量是幾何級數咁提升,加埋水花,大的腳步聲,第一次睇Playback嗰下,我哋自己都『嘩!』一聲。」

今次在「水舞間」起舞一幕,如要數到最貪玩,應該非呂爵安(Edan)、邱士縉(Stanley)及柳應廷(Jer)莫屬。Edan笑言出盡力起舞都多得Stanley,Edan解釋:「個景大家見到都好興奮,因為好靚,而在水裏跳有水花都好有型。咁在水裏面都要全力以赴,隻腳的力量都要全力以赴,而我是師承Stanley的大力踩水。」Stanley聽罷Edan的話,即道:「拍鏡頭水花大先好睇,為咗好睇,當然要出盡全力踏水。最後那幕李駿傑(Jeremy)在我後面,每次一完擰轉頭望住Jeremy,都是由頭濕到落腳。我有問他要不要細力啲,他說不用㗎!」Jeremy指為有型又要靚,也未有阻止Stanley的「惡行」,並說:「無理由叫Stanley細力些就我嘛,只不過最尾Ending Pose,我成塊面流晒水,但都要Keep住有型。」其實當災的不只Jeremy,AK因為著背心,當Stanley大力踏水時,水便由AK的腋下濺入到胸前,難怪AK會凍得打冷震。

另外,Jer鏟草式的舞技也令人很傷腦筋,事關其中一幕他要跣入中間位置,但AK、陳卓賢(Ian)、Lokman及Edan當時要踎低,結果Jer未有收掣直接鏟入,AK笑指「啲水有浪㗎!每次內心都不其然Wow一聲!」Lokman更將Jer這一鏟名為「狂人踩」。Jer聽到大家形容後,不禁失笑說:「咁好玩嘛!」本來未有加入討論的Ian都開聲說:「我踎低㗎,你咁樣飛埋嚟,你就好玩囉!」眾人你一言我一語的,氣氛高漲,結果Jer打圓場:「我太投入件事,大家都要濕下身啦!」

未有發言的邱傲然(Tiger)表示這次拍攝上了人生寶貴一課:「千萬別行差踏錯!個Intro本身好有氣勢好大力咁跳,咁啱嗰下係跪喺度,但音樂一起太細聲聽唔到,大家起晒身又好大力好有氣勢,我一不留神,就好似有個海嘯湧埋嚟一樣,嗰下就即刻醒咗!」但盧瀚霆(Anson Lo)卻說:「我幾Surprise自己冇食到水。」Tiger聽到即說:「我知點解他跳舞咁大力,可以擋番啲水出去。」

今次姜濤首度在歌曲中唱Rap,更要用英文演繹,他直言要「用英文說話」,這跟他的Solo作品《作品的說話》一樣,姜濤希望能從作品中說出MIRROR的心聲。

(即時娛樂)

查看原始文章