電影《阿媽有咗第二個》票房已經超越3000萬，作為神秘客串演出的古巨基，昨晚（9月3日）與導演彭秀慧在IG直播，解構《阿媽有咗第二個》當中秘密，彭導指電影首次上映是在大阪，當時已有人知道古Sir是神秘彩蛋，但大家都保守呢個秘密，因為彭導曾經話邊個劇透就「殺咗佢」。
古Sir提到當日收到彭導邀請，講到他在戲中的角色是演「古巨基」，古Sir笑言：「古巨基，冇人會演得比我好囉，我最熟佢囉，我諗我應該會幫到手嘅。」當時大家講個信字，古Sir話只知演古巨基，不知有甚麼戲份，笑說：「唔知會唔會有接吻戲、濕身戲，問都冇問就一口應承了。」
彭導認為《阿媽》是講歌手的故事，如果有位真實的歌手參演，在戲中為方晴加持就更perfect，彭導想了一堆條件：啱年份、肯提攜新人的、善良的、最好演過戲等，選擇不多的情況下，結果古Sir應承實在太好了。彭導特別翻看他與古Sir的WhatsApp對話，她說：「第一次邀請古Sir參演已即獲答應，第二次再問古Sir可否與方晴合唱亦爽快答應」，古Sir笑謂：「因為我覺得冇人可以扮到戲內的古巨基唱歌，搵唔到代唱㗎喇，哈哈！」
古Sir重提第一日拍攝與姜濤的對話，姜濤說他和媽媽睇咗古Sir主演的劇集《情深深雨濛濛》30幾次，古Sir聽罷驚訝到擘大個口得個窿，覺得他是孝順乖仔。古Sir笑謂：「佢係問題少男嚟，都係問我拍戲多，我哋去錄音但佢問我拍戲呀。哈哈哈」
姜濤又問古Sir如果現實中面對劇中兩位女主角會點揀，古Sir反問他「如果係你又點揀」，姜濤說：「呀，我都唔識揀呀！」除了好奇拍戲的事，古Sir亦大讚他用心又勤力做音樂，當日錄音過程極之順利，4、5小時便完成。
談到兩代歌手的分別，古Sir指當年是18、19歲藝訓班入行，約22歲做歌手，跟姜濤差不多。感覺年輕一代的他們已經很有才華和想法，而回想自己當年則單純地很喜歡唱歌，簽約做歌手後慢慢實戰中學習，工作經驗慢慢儲落，而這個世代的歌手很多都真係好叻，很多還懂得自己製作，曲風多元化好犀利。
