無綫小花陳欣茵(Yanyan)自2018年加入J2節目《#後生仔傾吓偈》後,曾經被安排突然空降《學是學非》擔任「實習生」,又獲時任TVB高層余詠珊公開大讚表現,2021年正式簽約成為「親生女」後一直機會不斷,沒想到一路上位之際,昨日(4日)陳欣茵突然宣布離巢,與無綫結束5年賓主關係,並表示將有新開始和新身份:「嚟緊想呈現不一樣耳目一新嘅『陳欣茵』!」
自從簽約無綫經理人合約後,陳欣茵之後的演出機會愈來愈多,加上她從不吝嗇,不時在社交網勁騷34D索爆身材,因此早已成為網民心目中的新一代「咪神」。
陳欣茵昨晚表示有重要事情宣布,寫道:「我單身了!!! 講笑,陳欣茵自由身了!係舊公司嘅合約正式完結。好多謝公司過去五年給予嘅機會,開頭誤打誤撞入行加入咗《#後生仔傾下偈》拍綜藝節目開始做主持,繼而入咗《學是學非》做是非精。」
陳欣茵又提到自己轉到翡翠台拍劇做演員客串《愛回家》,後來到拍《痞子殿下》。「第一次著古裝,繼而J2開台,拍咗好多我自己都好鐘意嘅節目《舖舖poker》、《逝者代言人》 三個飲食節目等等,都係我冇預計過會行嘅路。喺而到認識到一班好好嘅朋友,一直好照顧我嘅前輩,一直好包容我嘅幕後同事,一直提點提攜我嘅監製導演,最緊要係一路支持我演出嘅觀眾。」
陳欣茵又說自己不論演員、電視節目主持、活動司儀、婚禮MC,收到大家正面comment。「都係話每次見到我都覺得好歡樂呀、開心果呀、搞笑呀、貼地呀,夠真性情等等等等,當然好嘈呀,把聲好煩呀好尖等等嘅意見,我都照單全收,亦有認真努力改善同進步。無論好壞意見都由衷感激,因為呢一切都係好代表到我嘅性格同character,正正呢五年係81 82台印證咗我青春嘅足跡,每一位觀眾都見證住陪住我成長,先至有大家呢一刻認識嘅『陳欣茵』。」
最後,陳欣茵表示在幕前發光發亮,一直是自己的夢想:「但毫無牽絆地享受生命,係終極嘅人生意義,所以好希望可以自由自在咁去追夢。適逢9月新學期、 新開始、新身份,嚟緊想呈現不一樣耳目一新嘅『陳欣茵』俾大家,繼續自省、繼續追求進步,希望自己會喺唔同平台俾大家見到,未來會嘗試喺更多未知嘅領域 ,例如電影、廣告,Hope for the best,更多嘅機會俾大家見到我嘅作品,當然正式跳出框框,不論你我都需要時間適應同習慣,所以我會努力拍多啲片俾大家睇!」