請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

呂爵安凌晨出千字文撐《I SWIM》 不要盲鬧慶幸有份參與其中

忙於排練演唱會的Edan有見《I SWIM》結局引起爭議,深宵出千字文剖白心聲

ViuTV原創劇《I SWIM》星期五(22日)的大結局備受關注,評價兩極化,呂爵安(Edan)凌晨出千字文撐製作團隊,指大家不要盲目撐或鬧:「其實有意見先會有進步,盲撐係唔好,但盲_亦都唔好,所以我哋係好歡迎啲客觀建設性嘅意見。」他並表示自己最近忙於排練演唱會,仍未有空看《I SWIM》最後兩集,對於網民問有無感到失望,Edan表示:「無失望,反而好興(慶)幸自己有參與其中。」並直認曾經擔心李馬榮角色不討好:「擔心自己會唔會太死咕咕,會唔會淨係演到個角色好死好唔自然。」

呂爵安(Edan)及魏浚笙(Jeffrey)擔正的《I SWIM》結局備受爭議

對於故事及團隊備受網民評擊,他出面為團隊解畫:「哩(呢)個團隊絕對係盡咗200%嘅心血,200%嘅力量喺哩個作品上面,特別係導演,真係用愛發電。大家要繼續支持香港嘅創作同製作(唔止係劇集啦)。成日問點解外國嘅好咁多,喂大佬人哋多咁多資源,多咁多人才,多咁多support。」Edan文末表示自己:「講完,沖涼瞓覺!」收工未沖涼仍然凌晨出千字文力撐,可見對團隊超有愛。

師生戀的情節大膽,結尾留下伏筆要待電影解畫

Edan深宵千字文內容:

Iswim後話🏊🏻
哩幾日排緊演唱會,都冇時間出post,而家返緊屋企偷時間出下先,iSwim琴日大結局咗luu,自己都未睇尾兩集,可能要等演唱會後先睇到。但作為一個網癮少年,緊(梗)係睇到大家嘅討論,見到好多唔同嘅聲音啦。有人問我,你會唔會好失望啊?真心嗰句,我自己真係冇嘅,反而好興(慶)幸自己有參與其中。拍攝嘅過程固然學到好多嘢,但原來一個作品出街,睇返整個作品,再睇返自己嘅表現,同觀眾嘅意見,係會再令自己學到更多嘢,令自己有所成長,而哩啲經驗,就係可以比你用喺之後嘅演出 ,之後嘅作品。上今次李馬榮哩個角色,的確唔係自己做開嘅類型。當初做嘅時候,都好擔心自己會唔會太死咕咕,會唔會淨係演到個角色好死好唔自然。

另一方面,又擔心大家會唔會睇唔慣,會唔會唔相信哩個角色,會唔會唔鍾意哩個角色。但係如果我因為驚就唔試,我就永遠都冇機會做其他類型嘅角色,大家就永遠都睇唔慣我做其他性格嘅角色。如果我因為擔心就唔試,咁其實…..我乜都唔洗做㗎啦喎。上台表演都擔心㗎,咁係咪唔做啊?唔做,就唔會知自己有咩做得唔好,就唔會知自己有咩需要進步。可能有人今次睇唔慣,但經過今次之後,可能你就會睇得慣呢? 可能今次做得未夠好,但經過今次之後,下次咪可以做好啲囉,所以,一定要做。

大家成日話我哋落水好辛苦好凍拍攝好攰,但其實幕後團隊絕對係辛苦過我哋100倍。Call得早過我哋,收得晏過我哋,開鏡之前唔知準備咗幾多個月,落水陪我哋一齊落,演員有day off佢哋冇,仲未計錢添。哩個團隊絕對係盡咗200%嘅心血,200%嘅力量喺哩個作品上面,特別係導演,真係用愛發電。所以真係好感激同好respect幕後每一位,你哋真係好犀利。其實有意見先會有進步,盲撐係唔好,但盲_亦都唔好,所以我哋係好歡迎啲客觀建設性嘅意見。

唔怕老實講,我自己有時睇到啲負評都好confuse,話我唔緊要啊,講得啱嘅我會聽,然後盡力改。但有時我分唔到啲負評係因為本身唔鍾意我定點,搞到我都唔知take唔take好。不過都係嗰句,姐(即)係要再做好啲囉。有討論其實真係一件好事,有人講好過冇人講。但我覺最緊要係大家要繼續支持香港嘅創作同製作(唔止係劇集啦)。成日問點解外國嘅好咁多,喂大佬人哋多咁多資源,多咁多人才,多咁多support。你幾可聽到一個後生仔話大個想做導演想做編劇?所以大家_嘅同時,都要繼續大大力支持,咁件事先會越嚟越好。覺得有問題有唔好嘅就比意見,希望佢下次變好!講完,沖涼瞓覺!

多謝iSwim,多謝導演,多謝所有台前幕後,多謝有睇有討論嘅每一位,多謝李馬榮(Viutv吳卓羲),哩段旅程好難忘,希望大家可以繼續支持香港嘅作品,亦希望大家下一次又可以見到一個唔同咗嘅Edan啦。