周杰倫演唱會｜啟德5萬座位只賣3.8萬張門票　政府：舞台設計未必用盡座位｜Ray Online

周杰倫出年6月喺啟德體育園開演唱會，市民瘋搶門票。明明體育園主場館可以容納5萬人，市民唔明白點解主辦單位只係賣3.8萬張門票。文化體育及旅遊局解畫，話視乎舞台位置同設計，未必每次都用盡所有座位㗎。

每次座位數目都不一樣

文體旅局喺社交網站提到啟德體育園近排好熱鬧，進行緊唔同嘅測試同試業活動，零售同餐飲地方前日亦已經開幕。精彩活動陸續有嚟，市民已經搶緊出年嘅周杰倫演唱會門票，不過有市民質疑點解主辦單位唔用盡場館座位呢？局方解釋其實每個演唱會都好獨特，喺舞台設計方面亦創意無限。主辦單位有時會用晒成個場館嘅座位，有時甚至可能會有企位。視乎舞台位置同設計，未必每次用盡所有座位，以提供獨特嘅體驗。

局方舉例好似喺紅館開演唱會咁，有時開四面台，有時就開三面台；至於喺亞洲博覽館，有時喺中間搭條「天橋」，好似搞「catwalk」 咁，所以座位數目次次都唔同㗎。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)