卡塔爾特集：無酒精啤酒也被掃空

卡塔爾世界盃日記 Day11

一度以為墨西哥會奇蹟出線

丹麥抵出局，完全唔似10場入30球

由一日追四場波變睇兩場，空閒咗好多。剛剛日落，見到球迷村人氣漢堡店SALT居然唔使排隊，即刻去食。呢間嘢真唔簡單，係呢度最好食嘅一間，長期大排長龍，即使係凌晨4點半，仍然要等大半個鐘！今日唔使排，但等佢整都等咗15分鐘。

球迷村有兩個大銀幕，分別上演兩場戲碼，頭場我揀咗睇丹麥，結果睇到眼火爆，基本上丹麥嘅踢法係申請出局，之前艾歷臣病發後成隊展現出嚟嘅熱血完全冇晒。輸緊波仲向後踢，想點呢？

球迷村冇酒賣，認真掃興，一眾住客唯有飲無酒精啤酒。但要買到呢隻Zero啤酒都唔易喎，話說球迷村開放入住頭三天，超市有大量零酒精啤，但踏入第四日入住人數上升，零酒精啤忽告斷市，持續好幾日貨架上空空如也，到重新返貨，大家見到即搶。原來即使冇酒精，大家為咗有種麥味喺口腔流轉，都可以去到幾盡。

尾場冇揀阿根廷，睇沙特對墨西哥，因為呢度有海量沙特球迷，諗住同佢哋一齊尖叫。結果奇蹟冇落喺佢哋身上，反而同墨西哥擦身而過。墨西哥贏到兩球都話因黃牌較波蘭多而未能出線，當佢哋再一次送個波入網，大家都以為掂嘞呢次，點知又係詐糊，最終波蘭計得失球出線，呢場係暫時其中一場最引人入勝嘅賽事。

首名出線，阿根廷球迷梗係開心啦，我哋遇到剛剛從球場返來嘅一大三小球迷，當中一對父子化行妝，我哋即刻上前同佢哋合照，兼恭喜佢哋。

是日賽果：

澳洲 1:0 丹麥

突尼西亞 1:0 法國

波蘭 0:2 阿根廷

沙特阿拉伯 1:2 墨西哥

by港佬

港婦漂流：

Ig: @kennis.chiangmai

旅遊