歌手泳兒 (Vincy) 出道 17 年來一直是「靚聲」唱將，早期憑著《感應》、《我的回憶不是我的》等情歌走紅，近年的歌曲較少單純以愛情為題材，而是探討人性黑暗面、寂寞、逆境等，轉走暗黑風格，Vincy 說自己終於找到自己作為歌手的使命。
Vincy 近年給樂迷耳目一新的感覺，其中一首大熱暗黑系作品《溝渠暢泳》，靈感來自英國詩人 Oscar Wilde (王爾德) 的詩句：「人人都活在溝渠裡， 不過有些人總望著星星」，憑歌勉勵著生活中遇到挫折的人，不管多困難總能找到出口。
去年 10 月 Vincy 舉行演唱會，Rundown 把近年的暗黑作品跟早年的歌曲編排起來，做了一場她口中渴望了 17 年的演唱會。今年初更首度奪得叱咤樂壇女歌手銀獎，對 Vincy 來說是一個又一個的奇蹟。
Vincy 說暗黑其實是外界給她的定義，她自己認為是把一些大家未必太願意公開討論的話題放到創作裡，好像歌曲《野木蘭》中所帶出的改變宿命、追求公平等概念，唱這些人生課題，比「情情塔塔」的歌更適合她，「我覺得愛情方面我唔算係經歷好多，以前唱嘅一啲情歌，可能只係將我經歷過嘅嘢再放大少少，或者係想象出嚟。」
告別清一色愛情歌
原來 Vincy 本身喜歡探討人性善惡、道德等，私下的她最愛看懸疑電影，甚至是恐怖片，閱讀則首推 Nancy Drew 系列，「一啲 Detective (推理) 啲嘅內容，細細個已經鍾意刺激啲嘅嘢，睇完要諗、夠懸疑。」不過，十年前仍是 K 歌主流的時代，歌手要紅的方程式，就是要一首唱到街知巷聞的 K 歌，Vincy 亦被定義要唱一些「會紅」的歌曲，未能把自己喜歡的題材放在歌曲裡。「可能一出道大家認識我嘅歌就係慘情歌，好似都俾咗一個定位自己，好似理所當然就咁行，一直無同公司或者俾人知，我係鍾意一啲偏鋒或者神秘啲、激少少嘅曲風。」
至近年樂壇風氣有變， Vincy 說現在大眾開始接受藝人流露較真實的一面，表達自己看法，藝人形象亦不再是靠「塑造」，另一方面，樂迷對不同類型曲風的接受程度有所提高，令她敢於出走 comfort zone (舒適圈)，「以前大家可能會偏向鍾意聽情情塔塔嘅歌，但可能呢幾年大家都經歷咗一啲不似預期嘅狀況，對於觀眾嚟講會有好多共鳴。」
荊棘海 能愈刺愈痛愈有未來
Vincy 一出道便走紅，後來事業曾經歷低潮，加上母親中風、自己皮膚出現問題、失聲等，越過人生中一片又一片荊棘海，更曾想過要放棄，後來她認真問自己，到底還想做怎樣的音樂，直至遇上作曲人馮穎琪、徐浩、作詞人周耀輝等，為她創作出近年一首又一首大熱作品，將她再送上頒獎台。
「以前我覺得我係演繹個音，有時有啲歌我覺得自己唔係真係太了解，亦無乜特別去問點解。」現在的 Vincy 不再只是演繹好一首歌，而是會跟音樂團隊商討，自己有話事權，「以前可能收到隻歌就交比人去填，睇下作詞人有乜靈感，有一種主導權比晒人哋嘅，好似等中六合彩咁，睇吓寫唔寫得中我想講嘅嘢。」現在她自己亦會參與歌曲的文案創作、宣傳、MV 拍攝等。
她亦是少數會在 MV 加入英語歌詞翻譯的歌手，Vincy 說最初是為了讓看不懂中文的 MV 導演明白歌詞內容，後來發現有另一重意義：「其實音樂無分語言，你聽韓文歌都唔一定全部明佢講乜，如果有一個對照就大概可以知道，希望咁樣可以令廣東歌再闊啲，俾多啲唔同地方嘅人去認識。」
感應屬於自己的心聲
經歷人生起跌，社會大環境變遷，Vincy 說現在唱歌，未必再像從前追求「靚聲」，會接受有一點瑕疵，「我覺得意境、感染力緊要過個音係咪最靚、最滑淨，而家審美角度唔一樣，反而我有時會鍾意一啲可能唔太完美嘅演繹，會人性啲，有時唱得太靡爛，監製都會話要唱返靚啲。」
Vincy 年初獲得入行 17 年來首個叱咤樂壇女歌手獎項，說得獎感受時形容是個奇蹟，雖然走得比其他人慢，但每一步都很踏實。
回顧過去三年，她做回自己喜愛類型的音樂，轉走暗黑風格，她認為自己更開心，亦終於找到作為歌手的使命，「我自己用我嘅音樂將一啲可能抑壓咗好耐嘅情緒抒發出黎，一啲可能同我一樣有呢啲經歷嘅人，我可以做佢哋嘅代言人，咁我嘅使命就係唱佢哋嘅心聲出嚟，以前係無呢種感受嘅，呢個係我自己最大嘅得著。」
她又引用《葉落冰川》的歌詞勉勵大家每人都有能力，創造自己的奇蹟。「對我嚟講，奇蹟就係一樣可能人哋唔睇好嘅嘢，或者人哋覺得你未必做到嘅嘢，你最終都可以做得到，或者行到一條屬於你自己嘅路。」泳兒用 17 年時間一步一腳印地譜出自己的奇蹟，你，又準備好創造屬於你的奇蹟了嗎？
鳴謝
Wardrobe: ba&sh
Makeup: 木子維納_Vena
Hair: Zivyeunghair@leonardo3
venue: Busybird_busybirdbottle
留言 0