卡塔爾世界盃日記 Day17
摩洛哥神奇之旅再闖一關
喺卡塔爾嘅最後一日，嚟到卡達拉文化村（Katara Cultural Village）參觀。呢度充滿中東加歐陸風情，係一個非常非常大嘅藝術、文化設施集中地，猶如一個迷你古城。最宏偉一定係希臘風格嘅露天表演廣場，會舉辦管弦樂等大型表演，而一棟一棟古色古香嘅大樓裡面，佈滿各式博物館、展覽場所同藝廊，有心機嘅可以慢慢睇。當然唔少得各種餐廳同咖啡座，畀遊人好chill咁度過下午時光。
嚟到第一時間食餐晏，見到一間U Burger，啲漢堡十分邪惡，一於試下。一客漢堡有成三個，串住上，底盤有薯條，侍應就喺我哋面前淋啲熱辣辣嘅芝士落去，芝士淋淋瀬咁滴埋落啲薯條度，超邪惡，但好好食。
卡塔拉清真寺設有導賞，觀迎男女遊客入內參觀，男士除鞋後可從正門進入，女士會被安排著上中東黑袍由側門入寺，想睇下中東look嘅自己係點樣，呢個不失係個好機會。
港婦變咗中東婦人，嚇咗我一跳！
一個健談嘅卡塔爾導賞員熱情咁招呼我哋，佢係個語言天才，唔止識英文同普通話，仲識講廣東話。原來佢嘅中文都係做背包客浪跡中國時學返嚟嘅，冇正式學過，而且日文佢都掂，因為佢家姐喺日本讀過書，佢向家姐學下學下就識講啦。我心諗：有冇咁易呀？佢向我哋細說伊斯蘭文化同宗教習俗，令我哋增進咗唔少知識，最後仲交換埋ig。
世界盃盛事會為中東世界帶來甚麼影響？
離開清真寺，一直行就去到綿延1.5公里嘅Katara沙灘，呢度平時會有好多水上活動，今日就有好多隻帆船，帆上都係世界盃入圍國嘅國旗圖案。
最特色係沙灘上有一個好大嘅古老市集，唔係賣一般紀念品，而係展現傳統手藝，有人打鐵，有人紡織，更有一間模擬傳統陳設嘅村屋，令遊人更加了解呢個富貴小國未發現石油時係點嘅模樣。
市集有好多木船模型，反映出卡塔爾人舊時都係靠個海灣生活，採珠業係呢度嘅經濟命脈。
時移世易，卡塔爾已經現代化，經濟靠石油孭起晒。
遊畢Katara就整理行裝去機場，至於西班牙對摩洛哥嘅頭場賽事，一直用手機睇到上飛機，結果起飛前90分鐘完場0比0，抵泰後睇埋加時同互射12碼。我係撐摩洛哥嘅，但點都諗唔到西班牙射12碼可以衰過日本，直落3球宴客出局。
是日16強賽果：
摩洛哥 0:0（互射12碼3:0）西班牙
葡萄牙 6:1 瑞士
by港佬
港婦漂流：
https://www.facebook.com/kennis.chiangmai
留言 0