今場作客對越南以形勢嚟講，香港隊上半場中後段點數叫贏哂，如果把握得好啲，真係隨時可以入三四球都唔係無可能。
可惜今場最終又輸多場之餘，又再次食白果。2023年暫時就只有新加坡後衛送嗰球烏龍波，香港隊仍然未有球員靠自己將個波射到入個網裡面..但係對比番暑假對緬甸同中國嗰兩場，球員由守轉攻已經算有些許改善，攻起上嚟無咁急，而入肉嘅攻勢近幾場都越黎越多，似乎港隊成員都開始熟悉安達臣嘅踢法。今場對越南踢落黎有幾次中柱中楣，又有單刀機會，整體表現比之前有進步係無可厚非。
好多球迷話把握力係主要問題，不過我覺得中後場要解決嘅細節位仲多，始終前場配合上已經磨練到一啲火花，要嘅只係將火花變成實質入球。中後場問題反而仲多，下半場一開波嗰段係完全走哂樣，中後場幾乎崩潰咁，情況同對印度嗰場有啲似。安達臣雖然係用番金判坤時代尾聲嘅黃洋、黃威同陳俊樂嘅中場線，但黃洋已經準備四十而立，掃蕩能力同橫移速度都比起當年下降哂，黃威同陳俊樂靈活性都減低咗，而後面艾里奧同梁諾恆轉身都唔係快，對面一有反攻都好難搞。今日雖則只係輸咗一球十二碼，但係細節上可能都仲要再調教。
不過從比賽內容黎睇，港隊表現對比一年前安達臣地標戰鬥馬來西亞嗰陣係有住一定進步。而家友誼賽成績唔太好其實唔緊要，最緊要係搵出問題，試啱人同戰術，喺黎緊半年嘅亞運、世界盃外圍賽同亞洲盃決賽週有好表現！其實而家友誼賽啲機會炒哂兼無乜運仔，又有乜所謂？留番啲運氣去到正賽先黎料仲好啦！況且而家炒哂啲機會，可以俾安達臣之後有機會為呢啲情況做針對性訓練或者再進一步諗更多戰術去製造一啲前鋒更容易入波嘅機會。
▼ Follow 守拙頻道 (已授權予Line)
留言 0