前議員胡志偉因為上年嘅民主派35+初選案，涉違《港區國安法》，由今年1月開始還押至今。不過佢由本月16日開始，因為上年7.1非法集結案被判囚10個月，身份由還押變成在囚，明明都喺獄中生活咗咁耐，但胡志偉就不禁大嘆日子變得難過，究竟點解呢？
胡志偉今日透過同事喺Fb貼文，話7.1案判刑後由法庭返到荔枝角收押所，告別咗還押同埋還押編號，換上終身囚犯編號。佢又話熟悉的灰色還押囚衣換成啡色嘅在囚囚衣，雖然兩種衣服剪裁、布料相同，但唔同嘅顏色代表唔同嘅待遇，原來係探訪時間由每日見面變成每周一會，日子自然變得難過喎。
雖然胡因7.1案被判刑10個月，但按懲教署既定嘅計算方法，佢11月6日就會變回還押身份，其實都係變做在囚身份3個星期啫，有冇咁難捱啊？胡都話，會以期待親友到來嘅心情生活，希望時間過得快啲，轉眼就過一日咁話啦！
東網網站 : https://on.cc/東網Facebook專頁 : https://www.facebook.com/onccnews/
