「富貴KOL」雪姨今年初食評影片爆發盆菜風波被網民鬧爆，出片量和觀看次數都直線插水，至今都仲避緊風頭。不過唔聲唔聲，原來雪姨在ViuTV下星期一出街的真人騷《肥美人》有份出鏡擔任評判，節目主張宣揚「自信就是美」的概念，邀請參賽者上場展示才華，希望藉以打破大家對肥的世俗審美，主題非常正面，雖然暫時未知14位評判有幾多鏡頭，但今次雪姨如果表現得好，隨時一鋪翻身。
據知節目在上年12月開拍，而雪姨的盆菜事件於一月底發生，故拍攝時仍是人氣高企，至於出街版本會剩下多少內容，就要星期一首播先知。自從盆菜事件後，雪姨一度潛水，成個月未出新片，二月底復工出啲生活片試水溫，但影片觀看次數明顯不復以往。到三月難得再拍甜品食評，卻遭甜品店火速公開割蓆，澄清沒有找她賣廣告，雪姨應該短期內都未能擺脫「死亡之吻」形象。
