蔡瀚億結婚10周年公開感謝太太！懷舊造型慶祝首個「雙十」

蔡瀚億（BabyJohn）於2013年演出電影《狂舞派》出道，憑著該電影「柒良」一角獲得香港電影金像獎最佳新演員獎項，及後片約及工作不斷，轉眼間今年在演藝圈踏入第十個年頭。當年26歲的BabyJohn於出道當年結婚，夫妻多年恩愛至今，節目拍檔亦曾提過BabyJohn對太太Donut寵愛有加。適逢今年入行及結婚同是十週年，日前BabyJohn與太太Donut舉辦一個以懷舊 80 年代為主題的派對，與圈外好友一同慶祝這個特別的「雙十」紀念。

BabyJohn 表示：「十年時間過得好快，如果要以每一個『十年』 作為人生階段嘅分界線，其實只係佔好小部份，依家回想好感恩自己當年選擇事業起步同時跟另一半結婚，兩者一同踏入新階段，如果唔係有太太嘅支持，我未必能撐過事業上峰迴路轉嘅歷程。」

BabyJohn與太太Donut十年間都有恆常深度交談，坦然地面對大家每刻的狀態，直言有這樣的關係是用不只十年一同努力而建立。至於多年來經常被問到的生育大計，「繽紛嘅樂園遊玩過，安然沉穩嘅山水亦靜待過，能夠繼續一齊經歷每時每刻嘅風景，最重要係健康快樂喺埋一齊就足夠，生唔生小朋友呢個議題對我哋唔太重要。」

BabyJohn今日（5月22日）在社交平台出文，寫道：「回望呢十年嘅婚姻，一齊經歷過嘅風景，這一晚，如鮮花般燦爛盛放。」、「繽紛嘅樂園遊玩過，安然沉穩嘅山水亦靜待過，能夠繼續和您經歷每時每刻嘅風景，最重要係健康喺一齊，就滿足，錫婚幸福快樂。」

於 2019 年自組工作室的 BabyJohn 於這10年間經歷過事業高低，接下來除恆常的《宵夜》節目主持外，最希望能繼續以演員身分拍攝電影及劇集。「自組公司4年間經歷過疫情各樣大小事，自負盈虧真係好唔容易，今年暫定都會有兩套電影上映，但嚟緊期望同期待可以同電影公司或者一啲新導演有合作，重回初心，以演員身分拍更多好電影畀觀眾，可以再同大家講『戲院見』。」

BabyJohn正在籌備推出一本關於個人生活態度的書籍，以紀念首個演藝十年，「早兩年有出版社想搵我出書，對我嘅生活態度同我對日本及其文化嘅認知同見解有興趣，但一直都搵緊個好時機，就想趁今年特別嘅一年先出，暫定會喺我年尾生日時限量發行。」