魏浚笙「封盤」將迎娶女友 「冇人想另一半要匿匿埋埋」

有「翻版陳冠希」之稱的23歲Jeffrey（魏浚笙）近年憑住真人騷《調教你男友》、《膠戰》等大獲人氣，出曬名用情專一的他對年長4年的圈外女友Evelyn寵愛有加，拍拖7年依然sweet到爆，近日Jeffrey作客陳志雲網上節目《Stephen‧傾》時更自行「封盤」，爆料會迎娶女友做老婆！

節目上Jeffrey開口埋口都對女友有讚冇彈，自爆當初認識女友就覺得她出口成文而被吸引，又大讚女友有內涵。被問到有否擔心公開戀情會影響事業，Jeffrey直言自己從來冇想過會入行，所以一直無避忌，更man爆拋出一句：「對另一半係要有承諾，沒有人想做另一半要匿匿埋埋，對於對方其實不公平，身為男人要公開。」 

Jeffrey更爆料自己同女友已經同居幾年，更有聯名戶口，似乎已經為結婚鋪路，被追問有曾考慮結婚時，Jeffrey表示想在女友30歲前結婚，即使女友覺得太早，但他已經開始諗求婚細節，如要做到好驚喜、好浪漫，或去外國求婚，將求婚過程拍得像紀錄片以後再重溫，Jeffrey更表示不會大搞婚禮，只會跟家人好友簡單食飯就算。被問到會否想早日做爸爸時，Jeffrey坦言現時香港環境不太適合有小朋友，因為自己想送小朋友去外國讀書有良好教育，所以確保有足夠資源支持小朋友才會考慮生兒育女。