請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

楊千嬅爆老公丁子高連環整蠱事件 愛扮狗叫兼石春藏手袋

千嬅爆老公愛拿石春放在她的手袋。(大會提供)
楊千嬅在節目中跟王祖藍真情對話。(大會提供)

由王祖藍主持的《有個閨密叫祖藍》,昨(28日)晚播出第5集,嘉賓是「大笑姑婆」楊千嬅,千嬅在節目中向祖藍分享和老公丁子高及囝囝Torres生活日常。

千嬅透露丁子高私下相當貪玩,經常以整蠱千嬅為己任,而發生得最多的整蠱事件是「石春藏手袋」:「你有冇試過同佢食飯,食完永遠個袋都好重吖?佢同啲朋友夾埋,你知日本餐廳門口好多石春,每當我去廁所準備走,佢就將所有石春擺晒喺我個袋度。我奇怪咁重嘅,一打開個袋全部都係石春,你話係咪㷫吖?」祖藍聞言忍笑呼籲日本餐廳老闆要「小心丁生」。

千嬅又指丁子高試過扮狗叫,令她當眾失儀兼失魂:「佢行行吓街喺後面用隻手拍我隻腳,然後扮狗叫喎,我以為真係有狗咬我咪大嗌,咁我一大嗌好大聲㗎嘛,成條街望住我,佢咪喺度笑囉。」

相反10歲囝囝Torres思想成熟,而且識冧媽咪開心:「有次母親節佢寫卡畀我,下款寫Unknown son,我搲晒頭問佢咩嚟,佢話:『我想畀個驚喜你,但我又驚你唔知係我,咪寫埋Son咯』,我個仔會整蛋炒飯我食,佢鍾意煮嘢食嘅,我好感動㗎。佢仲話:『你可唔可以唔好成日話減肥,夜晚要食飯,如果你唔食飯我都唔食。』其實我只係夜晚唔食澱粉咋嘛,佢以為我絕食。」祖藍聞言爆笑回應:「我個女通常搶晒我啲嘢食,不過點都會留番最尾一啖畀我。

千嬅搞笑反問:「廚餘呀?小朋友真係好搞笑。」為了管住媽咪飲食,Torres更會與丁子高「聯手」:「有時丁生唔喺度,我會飲啲佢唔鍾意我飲嘅嘢,我個仔會影相Send畀老竇,仲話:『爹哋話唔畀飲』,我就話:『畀我飲一啖啦』!」並笑指與囝囝相處後,才學懂「掛念原來係要講出嚟」。

另在myTV SUPER的加長版,千嬅暢談多年來不同工作帶來的得著;她坦言很感恩做護士讓她學懂與人相處:「由細到大我讀女校,開頭同男人講嘢好驚㗎,直到喺醫院做嘢,因為要照顧好多唔同嘅人,就明白點樣去做人同埋個社會係點。」

千嬅亦難忘初入行於華星打拼日子:「我哋嗰時做好多宣傳,係咁跑通告,一大班人唔同路線用同一個司機,一齊走天涯。」

千嬅又談到她跟陳奕迅及梁漢文關係,儼如「屋企人咁熟」:「我唔使驚佢哋嬲,咩都會直接講。」她又感激師姐梅艷芳當年對他們照顧有加,並教曉他們全公司上下是大家庭:「佢對我哋新人好好,因為做新人冇咁上下知名度,好難有自己project,阿姐就會帶埋我哋出去攞演出經驗。」

(即時娛樂)

查看原始文章