謝嘉怡正式拍攝《愛．回家》　靠英文拼音記劇本

港姐冠軍謝嘉怡（Lisa）最近加入無綫處境劇《愛．回家之開心速遞》，飾演威龍集團的實習生，首次拍劇的她表示心情既開心又緊張：「因為我未拍過劇，同埋處境劇比較快，反應要快，我諗表現都OK，覺得好好玩，因為之前都係做綜藝多，感覺好唔同。」

由於Lisa的廣東話不靈光，她坦言要用英文拼音記劇本：「依家對白都係簡單啲，唔係好複雜，角色性格都係做番自己，但要記住攝影機位係有啲難。」她又大讚《愛》的一班演員十分有愛，埋位前不時會指點她發音及演繹方法。同劇的林淑敏及鄭世豪就非常歡迎Lisa的加入，又認為有新演員加入能增加劇集新鮮感。

東網網站 : https://on.cc/東網Facebook專頁 : https://www.facebook.com/onccnews/