瑞典真紅葉 - 皇家理工學院&斯德哥爾摩市政廳

之前有同大家分享過芬蘭嘅秋天有幾咁靚，見到反應非常好，不過芬蘭嘅秋葉主要以黃葉居多。其實呢個時間瑞典同樣都係秋天，係斯德哥爾摩好多地方都可以欣賞到黃黃燈燈嘅葉，今次就想同大家分享一個真正紅色嘅紅葉打卡秘景。

我所講嘅秘景係世界大學排名前一百嘅KTH皇家理工學院。之所以叫做秘景，係因為呢間學院唔係傳統斯德哥爾摩主要嘅旅遊景點，網上都無太多學院嘅中文資訊。我之所以識去呢間學院，全因有個朋友仔去過斯德哥爾摩做咗半年交換生，強烈建議秋天一定要去睇下紅葉。

果然呢間學院無令人失望，係地鐵紅線Tekniska högskolan站一出，就見到三排密密麻麻、修剪得非常整齊嘅樹，樹葉嘅密度形成咗機樹葉隧道，真係一出閘就已經很興奮興奮。再向前行就已經到咗KTH理工皇家學院正門。大樓有一個KTH校徽，而包圍住校徽嘅就係紅葉。

成間理工大學嘅歷史唔特別多講，想講嘅係呢個時間，成間校院都被紅色啲蔓藤樹葉包圍，幾乎成間學院都係紅葉打卡位，門、窗、單車都係免費嘅道具。KTH校園非常大，如果唔夠時間，可以直接去校園嘅右手邊D、E、F區，係紅葉集中地。個日我自己一個都影咗接近2個鐘。

除咗KTH校園嘅紅葉，其實市中心嘅市政廳一樣有好靚嘅紅葉包圍，而且市政廳入面裝潢華麗，絕對建議大家要比錢參加佢地嘅導賞團。

原來打算上市政廳最高嘅塔欣賞整個斯德哥爾摩市全景，但去到先知十月開始係冬天，塔頂暫停開放，只有導賞團可以入內參觀。由上午10點到下午2點每日有五場導賞，遊覽時間共45分鐘，導賞團費用KR130 (約HK$120)。

每年嘅頒發諾貝爾獎就係呢個市政廳舉行。導賞團由藍廳開始，雖然佢叫藍廳，但入到四周圍都係紅牆，導遊講解話原本真係打算油上藍色，因為藍色係瑞典國旗其中一種主色，但最後見到紅磚個顏色已經好靚，就保留咗紅色，但名就照舊叫藍廳，藍廳係諾貝爾晚宴地方。

之後我地去到二樓市政會大廳。會議廳就係平時佢地啲議員開會討論政策嘅地方，每個位都有寫咗佢地嘅名。會議廳仲有公眾席，最多可以比200位市民旁聽同表達政見。

由市政會大廳經過長長嘅百拱廳同王子畫廊廳，之後就會到達導賞團最後一站 - 金廳。金廳比人嘅感覺金碧輝煌，牆壁上嘅人像好有古埃及同古教堂嘅感覺。導遊話金廳係頒發諾貝爾獎嘅地方，然後就會行樓梯落到一樓藍廳接受大家嘅歡呼聲最後又會上番金廳跳舞娛樂。

導賞團結束，導遊叫我地幻想自己就係諾貝爾得獎者，慢慢行落樓梯接受眾人祝福。

**Follow us on:

Facebook: Flyday.hk

Instagram: @Flyday.hk

訂閱電子報: Flyday.hk**