最近去左銅鑼灣食日式燒肉放題「熊本燒肉」，睇食評好壞參半，所以我都約埋朋友去一試。
我地點左個任食套餐，午市價係HK$258，+HK$38就可以任食埋M5和牛，所以係HK$296就食到M5和牛放題燒肉啦！
除左呢個餐，其實佢仲有一個HK$158的豬肉+雞肉燒肉套餐，就無刺身任食，咁計落，其實HK$258套餐性價比都幾高，因為出面凍肉店買牛肉都好貴架，比多HK$100就可以食到好多唔同部位的牛肉，感覺都幾值得！
我一黎就點齊哂所有牛肉單品返黎影相先，上菜的木板賣相好似都唔錯，我覺得就覺得幾有氣勢。
不過正如傳聞咁，好多肉片都係未解好凍，但我覺得又無咩所謂，因為解凍完嘅肉其實佢地水份肉汁都無流失哂，所以直接放落去燒都未嘗不可嘅。
我同行朋友就話牛肉唔係咩靚牛肉，普通貨色，所以我就建議佢主要食返M5和牛好了。
M5和牛店員話係叫做牛板腱，賣相確實唔錯，肥瘦均勻，不過就薄左少少，燒完就有少少乾身，比較難掌握。
同時M5和牛有另一個部位會送上，叫做卡樂B位，即係牛胸腹，相對係非常之肥，幾乎8成都係脂肪，非常誇張。
我個人最愛係呢個部位，叫做牛側腹橫肌，份量每條都好粗身，好腍好彈牙，好重牛肉香味，呢個我翻啅左幾碟，好正。
另外我都好鍾意一款牛舌，好厚身，好彈牙，肉汁四射，燒肉真係一定要厚切先好食，因為一路燒會一路流失水份，所以越薄切越唔好食，所有厚切嘅款式都相對好食好多。
另外仲有多款唔同牛肉部位可以試到：
佢地有刺身可以點，不過賣相就差少少，無冰墊底，但有冰墊底其實都唔見得好好，因為D冰都唔知係生水定熟水，生水就衰過唔落冰添，所以只要快手食哂佢，其實都ok。
整體魚生類款式都幾多，包括有：三文魚、刺身帶子、北寄貝、馬刀貝、油甘魚、八爪魚片、希靈魚、真鯛、甜蝦。
我個人最鍾意佢呢款油甘魚，好腍好有魚味，無雪味，真心好食！
不過只係黎左一次，之後無論我再狂點幾多次，都無再上過油甘魚比我。
點左兩款沙律，一個係蟹肉蟹籽薯仔沙律，但我完全搵唔到蟹肉同薯蓉，只係有蟹籽(飛魚籽)，味道還可以，但佢黎左兩round都無蟹肉薯仔出現過。
另一款係麻醬豆腐沙律，都ok好食。
海鮮我地點左青口、蒜香清酒煮蜆、大蝦。
青口幾大隻，但無特別，正常。
蒜香清酒煮蜆好好味，蜆好鮮甜，肥美，好食！
大蝦，都ok新鮮，但我燒得太耐乾左少少，還可以。
有一款芝士年糕幾得意，本身炸起左，我再囉去燒一燒，變得勁軟熟拉絲，好食！
另外有一個泡芙，我地又囉去燒，然後裡面嘅奶油溶左，咁又有一種新食法。
最後我地燒棉花糖，因為好多人都話黎到最好食嘅係燒棉花糖，所以一定要食。
果然好好味！好有趣，我幾鍾意呢個玩法！
整體以性價比黎講，我覺得係ok，不過我朋友就覺得唔ok，因為牛肉唔夠靚，所以如果好似佢對牛肉咁高要求的話，你可以點HK$598果個SET，可以任食日本種澳洲和牛。
但以HK$298可以食到咁多款食品來講，我覺得係OK，會翻啅！
IG: mr.travelgenius / YouTube : 窮遊達人
【熊本燒肉】
地址：銅鑼灣謝斐道477-481號3樓
訂座電話 : 26173328
-----------------------------
➥? 訂閱頻道－ https://www.youtube.com/c/窮遊達人MrTravelGenius?sub_confirmation=1
📝 窮遊達人 - 官方網站
足本節目 ⏬
Full Version ⏬
Facebook/YouTube 搜尋Search
🔥窮遊達人 Mr. Travel Genius🔥
🎬 YouTube Channel -https://www.youtube.com/c/%E7%AA%AE%E9%81%8A%E9%81%94%E4%BA%BAMrTravelGenius/featured
🅿️ Facebook - https://www.facebook.com/mr.travelgenius/
📸 Instagram - https://www.instagram.com/mr.travelgenius/
----------------------------------
