37歲苟芸慧研製生酮蛋糕獲老公揼本創業直擊悠閒少奶歎啡打卡生活

苟芸慧自2018年嫁給富二代陸漢洋（William）後，刻意減產享受少奶生活，識飲識食的她前年赴法國學整麵包，返港後又跟法國名廚學整法式糕點，仲打算學以致用，由老公揼本開舖，不過受到疫情影響計劃要延期，苟芸慧惟有睇定舖位等時機到。餅店成行成市，要殺出新血路唔易，因為法式甜品糖份高易肥，苟芸慧正在努力研製適合減肥人士的生酮糕點，希望大家食得健康。一心做老闆娘的苟芸慧，整餅大計事在必行。

撰文、圖片：東方新地

苟芸慧醉心甜品製作跟法廚學整餅

苟芸慧（Christine）早前在無綫劇集《飛虎之雷霆極戰》中客串馬國明的惡妻，演技同以前一樣冇乜驚喜，皆因她志不在娛樂圈，尤其與陸漢洋結婚後，苟芸慧一直享受生活，近年她更醉心甜品製作，前年曾遠赴法國學整法式麵包，又在港修讀為期十個月的「法國糕餅藝術文憑課」，曾自封地獄廚神的苟芸慧上堂學整餅非常勤奮，課後更努力練習，經過480小時的學習，最近已完成畢業考試。

畢業後開教室獲老公揼本創業

據知苟芸慧瘋狂愛上整餅，本來計劃畢業後開舖，但因疫情關係受影響，知情者說：「苟姑娘（苟芸慧）一直想將自己嘅興趣變成事業，依家佢眼中只有整餅，仲話想畢業後同幾個志同道合嘅朋友一齊開間教室，教人整餅同賣餅，而佢老公陸漢洋亦好贊成，話打本畀佢開舖。苟姑娘自己都係易肥難瘦，甜品太高糖份唔健康，所以佢最近不停鑽研低醣低碳生酮飲食法，希望可以用喺整糕點上，要keep住味道賣相亦要好，令生酮蛋糕大行其道。」

可惜疫情令苟芸慧的餅舖暫時要擱置，這段時間她繼續裝備自己不斷練習整餅，並周圍物色合適的舖位，等疫情減退後再出擊。早前本刊記者見苟芸慧約友人到西環咖啡店歎咖啡，傾完個幾鐘再轉場去中環四季酒店High Tea，優哉游哉的闊太生活好寫意，苟芸慧掛住整餅歎咖啡，又點會再行番回頭路辛苦拍劇喎？

這日天氣悶熱，苟芸慧竟然黑衫黑褲外再著一件白色牛仔褸，看來是為了遮掩她翻脹的身軀，睇見都覺熱。

苟芸慧轉場再去中環四季酒店的 The Lounge享受 High Tea，做咗闊太果然識享受。

苟芸慧花15萬學法式糕點

苟芸慧去年開始修讀為期十個月的「法國糕餅藝術文憑課程」，由法國名廚做導師，要上夠480小時的課堂，通過考試的學員可獲頒發「法國Disciples Escoffier文憑證書」及法國教育部頒發的「法國廚藝訓練第五級證書」，代表學員擁有於法國開設餐廳及當執業廚師的專業資格，全期學費要15萬。苟芸慧好認真咁學習，學盡所有法式糕點，絕對唔係揸流攤，而藝人梁祖堯、谷祖琳及陳貝兒等也曾因課程的口碑而相繼報讀此文憑課程。