秋天嚟喇！好想去渡假啊！呢個土耳其嘅小鎮阿拉恰特（Alacati）位於愛琴海邊，成個小鎮都洋溢住希臘風情，絕對係渡假嘅好地方！
阿拉恰特以前有好多希臘人喺度居住，所以留底唔少希臘風格嘅建築，有「土耳其聖托里尼」嘅美譽。
鎮上面嘅街道巷仔勁有地中海風情，門框窗框係各種唔同顏色，非常精致，牆上掛滿花草，垂喺窗前，每轉入街角，都會見到各種色彩嘅花，聞到撲鼻嘅花香，好似走入童話世界咁，令人陶醉。
阿拉恰特嘅生活節奏好慢，同香港嘅煩囂、忙碌完全唔同，鎮上嘅居民悠閒生活，可以令你慢慢放鬆，坐底飲杯咖啡，享受慢活節奏。
呢個小鎮風景優美，係好多新人影婚紗相嘅地方，真係超級浪漫啊！
除咗可以喺鎮上行下影下相之外，呢度位於愛琴海沿岸，又點少得沙灘呢？呢度嘅沙灘係玩滑浪風帆嘅勝地，就算唔玩滑浪風帆都可以游下水、曬下太陽㗎！
想遠離煩囂嘅話，呢度會係你渡假嘅好選擇，去阿拉恰特交通都好方便㗎！喺伊茲密爾搭往切什梅嘅巴士，到總站轉乘Mini bus就到喇！
去土耳其旅行嘅話，不妨留一日去阿拉恰特（Alacati）觀光啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0