CONY近排真係好忙,咁多新餐廳同過江龍開幕,成日要四周圍去為大家率先試食。不過點忙都要唞唞氣,搵班姊妹去嘆afternoon tea,慢活又可以呻下日常煩惱,身心都舒暢返晒。另一個重點係咩呀?係可以影呃like相呀!近日香港港麗酒店與茶葉品牌Tea WG合作,推出全新afternoon tea set,不但睇得,更以茶入饌,食物設計別出心裁,相比咖啡,更鍾情於茶嘅女生就記得要試試啦。
今次酒店以Tea WG的「香港週末之茶(Weekend in Hong Kong Tea)」作靈感,巧用品牌不同茶葉揉合各種食材,製作出多款鹹、甜點,好似「薄荷綠豆凍湯」就注入了摩洛哥薄荷綠茶,味道充滿田園清新。「茶香法式閃電泡芙」的吉士醬則以忌廉加香港週末之茶拌勻,茶香十足,更能減膩,CONY好喜歡。「雲呢拿藍莓意式奶凍」就用上花茶啫喱,多重口感,滲出淡淡茶味幽香。
至於其他鹹點,CONY特別鍾意焗得香酥嘅「煙肉洋蔥雞蛋鹹批」,仲有「香烤三文魚」呈現出簡單的鮮嫩。甜點方面,雲呢拿味馬卡龍甜而不膩,「迷你大黃及士多啤梨撻」既精緻又可愛。呢度嘅英式鬆餅亦做得出色,濕潤有致,幾飽都要食埋佢。
既然afternoon tea set以茶為主題,飲品方面當然唔少得有多款Tea WG精品茶葉可供選擇。酒店更特意為主題調製手工冰茶,以綠茶作基調,加入蜜桃果蓉、薑啤調配,再放上檸檬、莓果和迷迭香,口感清爽,更可為豐富美點劃上一抹清新,而每份下午茶還免費贈送Tea WG精緻茶包禮品。
樂聚廊Lobby Lounge
電話:2822 8891
供應日期:即日至11月30日
供應時間:下午3時至5時30分
價錢:$518/兩位
地址:金鐘道88號太古廣場香港港麗酒店大堂樓層
留言 0