ERROR成軍6周年出跳唱歌　新曲MV致敬〈跳舞街〉邀得陳慧嫻客串

ERROR今年成軍6周年，終於推出跳唱新歌〈野舞士〉，而新曲MV亦剛上架，玩懷舊風，最驚喜就是邀來陳慧嫻客串演出，直線致敬經典歌曲〈跳舞街〉。

ERROR新歌〈野舞士〉走80年代citypop曲風 ，Fatboy形容：「今次曲風偏向80年代〈跳舞街〉嘅曲風，有種懷舊感覺，同埋我哋會一齊跳舞！」Poki說：「因為個feel比較Japanese，所以一聽呢首歌會感覺kimochi(舒服)。」今次推出跳唱作品，Dee表示是Fatboy多年心願：「咁多年嚟大家都期待我哋有跳舞作品，亦當係肥仔嘅心願，佢一直都係以個人跳唱歌手努力，今次ERROR終於配合佢推出一首跳舞歌，仲要係好un得嘅一首歌！」雖說是跳唱作品，但193表示：「呢首歌配合我哋成軍6周年，但趕住出MV，所以舞唔係排咗好多。」

Poki說到跳唱：「最緊要跳得開心，技術嚟講一定有，但開心係重要因素。」193表示認同：「我哋唔係講跳得齊唔齊，係講個vibe，同埋每個人都有啲個人風格融入喺團體舞入面，呢個係好有特色！」跳舞最強的Fatboy：「ERROR跳舞賣freestyle，唔係賣齊整。」Fatboy亦透露今次他找來好友兼排舞師Ali編舞：「之前我哋演唱會都係佢排，所以搵返佢嚟排，基本上啲舞步唔算好難，我哋仲度一個freestyle位俾Poki跳佢嘅台客舞。」193補充：「我見仲有加入Fatboy嘅搓肚腩，呢個我哋做唔到喇，唔知嗰幾下搓肚腩係咪為肥仔而排？」

〈野舞士〉曲風帶有80年代廣東歌經典〈跳舞街〉的感覺，Fatboy於是忽發想，邀請了〈跳舞街〉的主唱陳慧嫻客串MV，Fatboy表示：「慧嫻姐姐唔使跳舞，呢個MV有少少劇情搵佢客串，因為某程度上呢首歌都係向〈跳舞街〉致敬，所以搵佢過嚟係為我哋嘅MV增添氣息。」Dee感謝陳慧嫻今次參與：「多謝慧嫻姐姐抽空過嚟，加持一下我哋呢首新歌，都希望演唱會有冇機會合作到。」問到眾人對陳慧嫻的認識，Fatboy即表示：「我嘅回憶就係〈千千闕歌〉！」193亦笑言：「我哋『大大個』已經有聽慧嫻姐姐，聽到而家真係大大個都繼續聽，一直覺得佢好靚，但未見過真人，嗰種期待度，就好似期待一個電視人物喺電視機走出嚟。」193更坦言在見面前，他是有點緊張呢！至於Dee則大讚陳慧嫻歌聲甜美，Poki更揚言：「佢嘅經典歌一定要keep住聽！」

談到6周年，ERROR轉回感性mode，193分享道：「多謝fans一直陪伴我哋，我哋係自暴自棄嘅藝人，最近投票嘅我最喜愛組合都冇乜宣傳過但都keep住投我哋，好感謝大家，喺我哋冇出聲嘅時候都繼續撐我哋。」Poki也道：「多謝大家，呢6年都辛苦喇！」193聽到Poki所言，續道：「辛苦晒去支持我哋呢啲劣質藝人，不過只係我同Poki。」雖然聽似玩笑性質，但相信亦是ERROR打從心底最誠懇的謝辭。