公司換水係人性考驗 打工仔慨嘆一件小事就知道同事係邊種人 網友齊齊共鳴

經常有人話：「學校係社會嘅縮影。」其實辦公室何嘗唔係，除咗工作上角力，更貼身嘅可能係換水，如何應對正正反映各位同事嘅性格，堪稱係對人性嘅一場考驗。有網民近日便分享對於公司換水嘅感慨，引起唔少網友共鳴。

撰文：Yin｜圖片來源：香港討論區截圖、TVB劇集《愛回家之開心速遞》截圖、unsplash@enginakyurt

辦公室換水，似乎係大部分打工仔無可避免要面對嘅難題，一來係體力嘅考驗，亦係人性嘅考驗。有網民近日在香港討論區發帖，直指：「公司換水，根本就係一場社會行為實驗。」

水機無水？寧願斟盡最後一滴也不換水

樓主話，公司一朝早就會有一堆同事去水機斟水，沖吓咖啡、沖吓茶咁。隨著時間過去，水機喺中午時分已經開始見底，有同事去斟水時，可以聽到水機發出「慘叫聲」，表明自己就快無晒水。

跟住，同事們嘅反應唔係準備去換水，而係快快手出去斟埋剩餘嘅水。「手快有，手慢無」，唔夠快嘅同事就會發現已經無晒水。

以為佢哋會乖乖換水？少年，你太年輕了。依啲遲嚟嘅同事會選擇把心思，放喺點樣斟盡最後一滴水，即係將水樽打斜，倒埋剩餘嘅水畀自己。然後就直接返埋位。

同事忽然唔駛飲水 直到有人換水

一旦所有同事都意識到，水機已經滴水不留嘅時候，大家身體就會轉換另一種模式：停止水分吸收，好似再無需要飲水咁。之後一個、兩個、三個鐘，大家都完全唔會再行埋水機附近。

直到最後，堅持唔住的樓主亦要投降，自己走去換水。依個時候，所有同事的身體模式就會回復正常，突然好需要飲水，然後一個接一個咁出嚟斟水，當然係令樓主為之氣結。

網友直言換人就係人性表現

對於樓主嘅換水委屈，一眾網友都十分有共鳴，直言依啲就係人性，香港人太多自私精，身邊總有一兩個。

點止得女同事唔換水

有網友話，尚且接受到女同事逃避換水，但男同事都係咁嘅話，就真係太差。

換水一件小事就知邊個自私

網友直言，換水果然係社會縮影，一件小事就可以知道邊個同事自私；只要有人肯換一次水，就會之後每次都叫嗰個人換。

以為上流式水機有幫助？唔換水的一樣唔會換

有人就建議叫公司換過另一款水機，但很快被其他網友打臉，因為即使係較新式嘅上流式水機，唔肯換水嘅人始終都唔會換水。亦有人嘗試解讀，點解部分同事誓死唔肯換水，可能係覺得換水關乎職級，如果落手換水就係低人一等。