哈佛輟學生發研發AI朋友裝置 助人終結孤單！

唔知大家有冇睇最近上映嘅大熱電影《汪汪夢裡人》呢？電影講述一隻好孤單嘅狗買咗一個機械人返嚟陪佢生活解悶，如果喺現實你又會唔會想有一個咁嘅機械人陪你呢？機械人就冇啦，不過最近就有個哈佛輟學生Avi Schiffmann研發緊個AI朋友裝置，令大家日常生活可以多個朋友傾計啊！

呢款AI朋友裝置名為Friend，Friend係一個發光嘅圓形球體，大家可以將Friend當成吊墜咁戴住又或者夾住喺件衫到。Friend會透過藍牙連接手機，然後使用者就可以㩒裝置上嘅對講機制同佢對話，裝置就會通過應用程式去回覆訊息，而且由於佢一直都聽緊你嘅聲音，所以佢都會主動send訊息關心你，例如喺你去面試前會祝你好運。Avi Schiffmann就話設計Friend嘅目的並唔係作為心理治療師，佢只係一個陪你傾計嘅AI朋友，希望大家可以透過Friend嚟終結孤單！

Friend暫時仲喺早期開發階段，但依家已經開始接受預訂，計劃下年1月會出貨，售價係99美元（約港幣772元），只係700幾就可以買到個朋友你又覺得值唔值呢？有咗Friend之後大家就可以唔洗再唱從不喜歡孤單一個～除咗買俾自己解悶之外，如果你身邊有啲好多經講又或者好多野呻嘅朋友就買個俾佢哋，塞住佢哋把口！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/