「笑得你心裹發寒」估唔到有一日呢句會用到喺機械人身上。近日，日本科學家成功將活體皮膚附住喺機械人嘅面上，甚至令到機械人可以透過皮膚露出好似真人咁嘅笑面，但係就有唔少網民表示覺得個笑容好詭異，唔知班科學家研發嘅時候夜晚瞓覺又有冇發惡夢呢？
東京大學教授竹內昌治同佢嘅團隊喺近日成功研發咗可以將皮膚附住係機械人嘅固定系統，首先，佢哋喺面部模具穿咗啲窿，之後再注入由膠原蛋白同人類真皮纖維細胞組成嘅凝膠，等咗7日之後，凝膠變成一層同模具穩固結合嘅皮膚覆蓋層，然後再喺矽膠基板穿窿，再等佢凝固，就變成咗仿真人嘅皮膚面部，只要郁基板後面嗰兩枝杆，就可以令塊面露出微笑。竹內教授同佢嘅團隊都相信遲下可以透過加入汗線、毛孔、血管等等，可以創造出更加逼真嘅皮膚，甚至希望可以令機械人嘅皮膚有自我修復同埋觸覺敏感嘅能力。
當呢項研發完全成熟嘅時候，就可以打造更加逼真嘅機械人，同埋將呢項技術用喺化妝品測試同整容外科醫生嘅培訓。既然可以整到真人咁樣，用得唔好嘥，唔知可唔可以好似啲電視劇咁將呢項技術整個機械人女友/男友咁呢？造福下啲單身狗都好啊！
▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/