昨晚舉行嘅聯賽盃第二圈賽事，富咸係主場迎戰熱刺，基於體力上嘅考慮兩隊都有唔少輪換，而熱刺方面更只有李察利臣(Richarlison)同雲迪芬(Micky Van De Ven)兩位正選球員出戰，埋下出局嘅伏筆🥲
上半場富咸雖然只有38%控球權，但著力防守反擊並且威脅甚高，19分鐘富咸左翼波比列特(Bobby Reid)係左路盤球玩弄熱刺中堅山齊士後，傳中一刻皮球撞到熱刺中堅雲迪芬改變方向入網，造成烏龍波為主隊率先打開紀錄👀
另一邊嘅熱刺落後下感覺上仍然不溫不火，欠缺爭勝嘅慾望，中堅山齊士經常交醫院波，中場靴爾堡狀態不足，史基比只係工兵作用，後備上陣19歲嘅史加律(Dane Scarlett)更係頻頻失機，而唯一嘅機會更為特別😂
當時下半場55分鐘熱刺一次進攻不果，但富咸右閘球員迪堤(Tete)球鞋被踩破，有趣嘅係佢需要跑回更衣室更換球鞋，結果令球隊短期陷入10人應戰嘅局面，而熱刺亦把握呢段時間，係56分鐘佩利錫(Ivan Perisic)左路傳中，李察利臣禁區頂入追平。其後兩隊互有攻守，直到占士麥迪臣落場，形勢先逐漸倒向熱刺一方，因為麥迪臣不論角球、罰球同帶波盤球都極具威脅同創造力，唯獨隊友未能把握，例如後生仔史加律同艾馬臣🥵
最後兩隊要靠十二碼分勝負，其中達雲遜山齊士射失，最終富咸十二碼5比3淘汰熱刺晉級下一圈。熱刺嘅出局除左反映後備球員質素不足同重建需時之外，領隊普斯迪高路(Ange Postecoglou)亦有責任，過多嘅輪換令球隊較為被動，落後之下換入後生仔史加律未有太大作用，而真正有作用嘅麥迪臣就係82分鐘先換入，因此今次聯賽盃第二圈出局會係一個教訓🥴
▼Follow 足球港場
Instagram: https://www.instagram.com/footballarena_hk/