已婚潘梓鋒庭上承認同吳紫韻為情侶關係 打傷鄒兆霆被判守行為

無綫《東張西望》39歲已婚主持潘梓鋒於今年8月6日涉嫌為《3日2夜》女主持吳紫韻而出手打傷《愛．回家之開心速遞》男星鄒兆霆，事後被捕兼告上法庭，案件今日再進行審訊。控方考慮到事主鄒兆霆已康復，所以同意不提證供起訴，以簽保守行為處理，而裁判官就批准被告潘梓鋒自簽1,000元、守行為36個月及支付訟費500元，將不留案底，守行為期間不得企圖作出暴力行為或威嚇他人，特別是對事主鄒兆霆。

據案情披露潘梓鋒同控方第二證人吳紫韻於2019年至今年為情侶關係，期後因感情轉差而分手。案發當日下午，鄒兆霆身處吳紫韻寓所，潘梓鋒突然登門造訪，潘梓鋒入屋後同鄒兆霆因為感情糾紛而起爭執，期間潘梓鋒重捶鄒兆霆頭部約14下，又推鄒兆霆至牆邊並用力扯對方耳朵，吳紫韻勸阻不果，直到潘梓鋒見到吳紫韻哭泣才停手。鄒兆霆事後驗出左眼眉及左耳有3處撕裂，需縫10針，翌日潘梓鋒被捕時堅稱：「我無打人」。

審訊結束後，潘梓鋒透露未知幾時復工，要由公司決定：「呢件事期間有圈中朋友打畀我問候，當中包括林盛斌，佢好有義氣，令我明白咩叫雪中送炭。感情事唔想再多作交代，多謝大家關心。」而吳紫韻就表示希望各位都可以重新平靜生活。