如花李健仁中風開腦保命成功 社交網答謝古天樂 甘比出錢出力

星爺周星馳曾經捧紅唔少演員，「如花」李健仁係其中一個，扮醜女挖鼻成為佢嘅招牌造型，更殺出血路喺國內市場非常受歡迎，去年59歲嘅如花不幸喺深圳中風，及時開腦保住條命仔，但右邊身癱瘓及失語，在李太悉心照顧至今仍在休養中，康復進度不錯。時隔一年，李健仁在微博交代近況，並感激圈中人在他出事後支持和鼓勵。

撰文：東方新地

如花李健仁中風後局部失憶

如花李健仁曾經係星爺愛將之一，近年轉戰大陸拍劇，一直身體壯健，去年有指在深圳同朋友焗桑拿期間突然頭痛暈倒，由助手送院搶救，證實中風，雖然即時做開腦手術保住條命仔，但受中風影響右邊身癱瘓而且一度講唔到嘢，最後佢選擇返香港繼續就醫。事隔一年，如花李健仁在微博交代最新狀況，更感激古天樂和甘比(陳凱韻)在他出事後出錢出力幫忙

如花李健仁表示為盡快康復，中醫、言語治療及物理治療三管齊下，治療需要龐大費用，他感激甘比和古天樂出錢出力幫助，又多謝好友李建邦一直為他的事奔波，並寄望盡快完全康復，在幕前跟大家見面。

田雞(田啟文)證實如花於去年出事，仲話有去深圳醫院探過佢，雖然如花認得田雞，但始終開過腦，有啲嘢都係唔記得，講嘢就一時好順，有時會窒吓窒吓，之後如花返咗香港屋企休養，有做物理治療。田雞仲爆如花出事後經濟上肯定有壓力同困難，仲話想集合啲師兄弟，睇吓可以點樣幫佢籌款，不過被問到周星馳星爺是否有意幫忙，田雞卻斬釘截鐵指沒有。

星爺帶挈入行

如花同星爺係中學同班同學，89年經星爺介紹當幕後場記，後任攝影助理、副導演及製片等。92年李健仁男扮女妝客串《武狀元蘇乞兒》出位，招牌動作是用手指尾撩鼻，之後扮上癮喺《唐伯虎點秋香》、《國產凌凌漆》、《食神》等表現突出成功令觀眾留下深刻印象，當年佢喺《九品芝麻官》飾演角色叫如花，呢個暱稱就跟足佢咁多年。