好多時聽到僱主會抱怨覺得外傭姐姐聽唔明自己講嘢，好似雞同鴨講咁，但又唔知點算。近日有位媽媽係Facebook群組 #外傭僱主必看新聞訊息度分享自己最近請咗一個零經驗印傭，佢坦言唔介意花時間教同一早預計到會有溝通困難，所以請咗足足一個星期假去教佢做一次所有家頭細務，真係非常有耐性。最令網友大為稱讚嘅係，呢位媽媽竟然親手製作咗一份「有圖時間表」，上面好清晰地指示姐姐喺幾時要做啲咩，十足十小學生嘅工作紙，相當有趣；呢個舉動亦顯示出媽媽的確係好有心想盡快幫工人姐姐上手。
而媽媽表示使用時間表後，雙方可以溝通到7成，但都少不免會有甩漏，如：開冷氣忘記閂窗、出街忘記戴口罩、連續四晚開住燈瞓覺……等蝦碌問題。不過點都好，聘請新手外傭的確需要比時間對方適應新環境同生活習慣，操之過急可能會有反效果添。
*Follow us on:
‧ Facebook: 黃巴士親子天地
‧ Instagram: Yellowbus.com.hk
‧ Website: www.yellowbus.com.hk/
