姜皓文、COLLAR成員王家晴（Candy）及楊偉倫等人，今日（14日）一同出席喪屍電影《邪Mall》煞科祝酒晚宴，片中二人飾演一對父女，姜皓文大讚Candy成熟，Candy則形容對方十分好人，非常耐心地指導她。
香港驚慄恐怖電影《邪mall》由黎震龍執導，夥拍參與多套Marvel電影《復仇者聯盟：無限之戰》及《銀河守護隊3》等的荷里活資深特效化妝師Mark Garbarino，全力製作港產驚慄恐怖片觀影新標準。姜皓文指他是第一次接觸喪屍題材的電影，直言拍攝過程十分辛苦，為配合電影死場氣氛，需要等待所有商舖關門，所以拍攝期間每天都要開夜班，由深夜拍到清晨，更曾遇上10號風球及黑雨的極端天氣而被迫停工，因此劇組上下為了趕進度，這兩星期都頻密加班。
提到今次邀得荷里活資深化妝師負責喪屍特技化妝，姜皓文笑指過程十分漫長：「三個幾鐘頭化妝、大槪一個鐘頭落妝！」他又提到，化上喪屍妝拍戲相當辛苦。「除咗我哋每一晚開工，全夜班、冇日班、由凌晨拍到中午，個喪屍妝係類似四個膠袋包住你塊面咁，加上商場環境狹窄、沒有冷氣，拍攝過程更加倍辛苦。」
至於首登大銀幕的Candy，分享自己對喪屍題材大感興趣及平日很喜歡看，所以今次能擔演這電影的主要角色感到興奮，又指姜皓文在拍攝時十分關照她：「黑哥十分好人，又好耐心咁指導我。冇畀人鬧，亦都唔多NG，幾個take就過。」被問到之後會否考慮進軍電影界，Candy回答：「唱歌同拍戲我都好鍾意，兩者都畀到唔同滿足感我，所以有機會我都會嘗試。」
Candy首次擔正女主角，自言從姜皓文及另一男演員「阿卵」楊偉倫兩位演戲前輩對手身上獲益良多，姜皓文亦對Candy在戲中的表現評價甚高：「Candy好成熟，完全唔似呢個年紀，做得好好！我有時睇Mon，見到佢好成熟，佢成日話『輸蝕晒！個樣成熟！』，同埋佢好比心機！」Candy則表示，今次集中於深夜凌晨拍攝，沒有時間為捱夜進行保養：「我就係冇時間！返到屋企就即刻瞓！上個禮拜Collar又要排舞，拍完戲排舞、排完舞再拍戲，所以冇時間做facial。」
