江𤒹生新歌MV有女有腹肌　上架半日超過51萬觀看次數

繼三年前〈蝸牛〉後，MIRROR成員江𤒹生(AK)找來隊友陳卓賢(Ian)再為他寫新歌〈Blue Monkey〉。當中超高音部份挑戰AK唱功外，MV遠赴美國拍攝，還有靚景靚女，加AK八嚿腹肌，勁吸like，上架半日已經超過51萬觀看次數。

AK表示Ian用激將法要他飆高音：「Ian好爽快就答應幫我寫歌，冇游說好耐，佢的而且確用咗激將法要我挑戰高音，因為佢咁啱喺最尾寫咗句好高音嘅嘢，我問佢係咪認真㗎？佢就話：『你咪試下唱囉！』」AK解釋歌名〈Blue Monkey〉由來：「我平時會睇一啲New Age嘢，其中有提及Blue Monkey，代表一個人要玩得開心啲，呢個係喺世界裏面嘅其中一個任務，有啲人會成日唔記得點樣去玩，我之前做嘢都係咁，太認真，唔識玩住去做，結果個人冇咁開心，亦做得冇咁好，最後慢慢發現，有啲嘢可以放鬆啲，輕鬆啲玩住去做，效果會更加好，同Oscar溝通之後，就有呢個歌詞內容嘅決定。」

〈Blue Monkey〉推出前，AK因為要到紐約參與電影節，所以就有在當地拍MV的念頭：「平時睇開外國MV都不外乎係Party、女伴，難得去到美國，當然好想拍到咁樣嘅MV，因為外國啲屋好大景又靚，想做嘅效果就似返外國氣氛多啲。」AK更大騷八嚿腹肌，不過最難原來係駕車：「今次真係有好多靚景，睇極都咁開心，外國地方大，就係因為地方大，唔知點樣選擇。因為我哋租咗架1964年Mustang古董車，揸係要好有技巧，如果唔係好易死火。」