TVB《尋人記》追訪30年前消費騙案苦主！廿萬買縮水樓/買冷氣求退貨收恐嚇電話

TVB新節目《尋人記 》由方東昇同幾位女主持一齊尋找那些年在新聞中接受過訪問的受訪者，播出以來大受好評。最新一集講到那些年的消費騙案苦主，騙徒手法層出不窮是古今不變的定律，究竟30年前3宗騙案的苦主如今變成點？佢哋喺節目中憶述當年慘痛經歷。方東昇仲再次發揮金句王本色，用金句道出香港普羅大眾之苦。

原文刊於：新假期 ｜撰文：Mila｜圖片、資料來源：TVB節目《尋人記》｜編輯：Sunday Kiss

苦主1：買新冷氣冇雪種 退貨後收恐嚇電話

苦主鄧先生當年以$4,100的價錢訂了一部進口的冷氣機，點知店員以無貨為理由氹佢轉另外一部，後來發現進口貨竟變本地產！更離奇嘅係部冷氣開機都唔凍，檢查後發現原來裡面根本冇雪種！鄧先生據理力爭，加上電視台採訪及消費者委員會幫忙，終於可以拎返冷氣機錢。不過後來就收到疑似電器舖背後惡勢力打來的恐嚇電話：「你好嘢！」，好彩後來咩事都無。

苦主2：當年「縮水樓」撼贏依家「納米樓」

以前的售樓書規管無咁嚴格，一度出現圖則比例不符的「縮水樓」，擠逼程度可以形容為：「一入房就已經上咗床，一落床已經出咗廳」，苦不堪言。

林小姐就係其中一個苦主，佢買樓比人呃後仲要俾朋友笑，方東昇搵返30年後的苦主，原本唔想做訪問的林小姐，都成功比方東昇氹到，半推半就邀請攝製隊上屋企接受訪問！原來個陣林小姐都算好彩，等咗2-3年發展商原價回購單住，而家住喺200多呎的單位好滿足，更笑言睇返片段後發現該單位比起依家嘅「納米樓」更好。

苦主3：牛奶放30日發臭可以換錢

90年代有一單「牛奶種菌案」轟動一時！係香港早期嘅層壓式騙案。聲稱用高科技護膚品項目，要參加者買「種子」，再加入牛奶種30日，得出的發臭物體就是原材料，把原材料交給公司就可以賺取87.5%的利潤。

其後經化驗發現，「種子」原來只是脫脂奶粉。被揭發是騙案，老闆被商業罪案調查科拉咗去坐監，不過一班苦主就血本無歸。

方東昇再爆金句 道出普羅大眾之苦

方東昇本集金句：「世界上最大的空間，係進步嘅空間；最細嘅空間，係屋企嘅空間！」