MIRROR呢隊新嘅唱跳男子組合一共有12個成員，成員係由ViuTV大型選秀節目《Good Night Show全民造星》入面嘅參賽者精心挑選出嚟組成！上次就同大家睇咗MIRROR六個成員嘅大起底，今次就睇埋另外六個啦！
Ian喺《全民造星》嘅時候其實已經係大熱，佢一副天然呆嘅樣子呆得嚟又帶點可愛，所以獲得「樹熊」呢個稱號！天然呆暖男呢個稱號成功幫佢擄奪一班少女嘅心㗎！
除咗有一班妹妹fans，就連花姐都係佢嘅粉絲，更加稱佢為「男神」！Ian 雖然平時天然呆木木獨獨咁，但一玩音樂就瞬間變charm，可能嗰種反差就正正係佢嘅迷人之處！
自彈自唱可以話係佢嘅強項，無論係鋼琴定係結他一樣冇問題！所以話，識玩音樂嘅男仔真係好charm呀！
Jer由《全民造星》開始已經被網民大讚唱得，只可惜無緣晉身決賽，但係最終都成功出道成為MIRROR一員！
唱功了得嘅佢都經常喺IG發放自己自彈自唱嘅影片，一支結他配上一把靚聲就足以呃like！
除咗會post唱歌片之外，Jer嘅IG都有好多同女朋友放閃嘅相，真係sweet到爆，小編都就嚟比佢閃暈啦！
Jeremy應該係組入面唯一一個走韓風嘅成員，白皙嘅肌膚襯埋五顏六色嘅頭髮，形象十分鮮明易認。因為Jeremy嘅頭髮經常都會轉色嘅關係，粉絲們都會叫佢做「變色龍」！
雖然佢係「變色龍」，但其實黑色頭髮都幾好睇呀，唔知會唔會考慮染返黑色呢？
睇嚟組員嘅關係都好close好warm，究竟影呢相嘅時候佢哋係做緊咩呢？
相信唔洗我多介紹大家都知姜濤係邊個！19歲年紀輕輕就贏咗《全民造星》冠軍，獲得100萬獎金，更加係《全民造星》入面嘅人氣王！
叫得人氣王嘅姜B除咗IG有4.6萬followers遠遠拋離其他組員之外，仲相繼接拍咗幾個大牌子嘅廣告，當中包括化妝品牌Etude House同Olay，可以話係星途無可限量！
更加曾經有傳聞話姜濤參加《全民造星》期間，已經有幾間公司想簽佢做旗下藝人，唔知係真唔係呢？
Stanley可以話係要高度有高度，要肌肉有肌肉，要才華有才華！Stanley嘅強項係跳舞，舞蹈員出身嘅佢跳起舞上嚟真係超級有台風！
Stanley為人熟悉嘅除咗係佢嘅舞藝之外，就係佢嘅胸肌！喺《全民造星》比賽期間有評判更加話「最記得就係Stanley嘅胸肌！」，唔知MIRROR出道之後，Stanley會唔會負責除衫嘅角色呢？
Stanley嘅女朋友原來係ViuTV選美節目《美選D.n.A》亞軍Alina，依家兩個人都係ViuTV嘅藝人，唔知會唔會情侶檔出活動呢？
或者你會對Tiger無咩印象，但如果講起跳拉丁舞你又會唔會認得佢？喺《全民造星》入面以拉丁舞突圍而出嘅Tiger深得評判觀眾歡心，最後都成功出道！
年紀細嘅唔止得姜濤，原來Tiger同姜濤一樣都係得19歲，唔知呢個會唔會都係一個優勢呢？
除咗跳拉丁舞之外，佢亦都識彈電子結他，音樂又得，跳舞又得，Tiger仔可以話係才華洋溢呀！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
