專訪｜The Fight Goes On！陳柏宇率性隨心，無論順逆都繼續前行

隨性哲學一：聽話

Jason 說自己是一個很「聽話」的歌手，公司叫他做甚麼也會做，而自己過往做音樂並沒有十分投入在音樂部分，只集中在歌唱技巧上。雖然近年對於他歌唱技巧同樣是無止境的追求，但同一時間希望在音樂製作上參與度更高。

「做得耐會愈嚟愈清楚自己有咩鍾意、唔鍾意。」他會在音樂當中表達自己對生活的看法，「首歌點樣編曲、想揀咩類型嘅歌、想揀咩氣氛嘅歌都會參與。」而他的想法更會源自於閱讀不同文章、不同人的看法，甚至現代哲學影響，「我好鍾意睇短嘅文章，因為短啲可以了解多啲人嘅睇法。」

隨性哲學二：做自己

Jason 今年推出的第一首歌《一人傍晚藝術館》叫好叫座，成為陳柏宇職業生涯中首支五台冠軍歌，創 Jason 音樂事業另一高峰。他說，此歌首四句歌詞很符合他的性格：

閃過了舊派意念
冰室裡鴛鴦放糖提煉
開了半面窗馬路放電
亂髮下 亦帶有詩意

他笑說去到某些年紀，當認為舊事物是美好的時候，就證明自己老了。經過多年來的歷練與沉澱，Jason 選擇做回自己，「我朝早起身之後，可以著睡衣出街，無咩造型，無咩偶像包袱，我覺得偶像唔應該係包袱，做返你自己就唔係包袱。」

但性格隨性，在競爭激烈的樂壇似乎不太吃香，作為歌手都最怕自己「唔紅」，但 Jason 對於外間說他是「隱世歌手」、「上不到一線」等評價卻看得很開，「合理啊！我有時係紅歌唔紅人，有時係紅人唔紅歌呀！」爽快的回答顯得他份外隨性，「唔應該只係專注於有幾多人聽、有幾多人睇，如果無人聽、無人睇就做其他嘢，就唔係 contribute (付出) 緊，我覺得呢個出發點係錯嘅。」

陳柏宇 (Jason) 早前以首位香港歌手身份登上日本音樂節目 THE FIRST TAKE ，再次成為網上熱門搜尋。用上「再次」一詞，是因為 Jason 雖推出過多首膾炙人口的作品例如《I Miss You》、《你瞞我瞞》，但也經歷過事業低潮期，關於他的新聞都是生兒育女的消息，並非音樂。出道 17 年無論高低起跌，Jason 仍然處之泰然，一 Take 過後他又跟隨自己的步伐再次出發，於 6 月展開《陳柏宇The Fight Goes On World Tour 2023》，第一站會去英國。

在THE FIRST TAKE 的兩次演出，歌曲《你暪我暪》及《有天》都是改編再重新演繹，Jason 說極簡的編曲為他帶來新啟發，「喺香港做音樂，一聽就覺得是 recorder version (錄製版本)，但去到現場演繹通常會簡單化，將重點放喺旋律，或者突顯某一至兩種樂器，我自己比較喜歡後者。未來會同唱片監製講如果做歌，都希望好似 THE FIRST TAKE 咁去編曲。」

隨性哲學三：樂做舊派

現今樂壇愈來愈多後起之秀，Jason 也漸漸地變成前輩，他認為自己要有種前輩風範去繼承和擔當，「以前跟前輩合作會有一種唔同嘅感覺，有啲『笠水』(意思：「驚青」或「臨場縮沙」)，而家要擔當前輩嘅角色，就算我『笠水』，都要有一種唔『笠水』嘅感覺，提醒自己唔好咁『笠水』」。

他認為當前輩如為人父母，應該要領導後輩，塑造他們成為負責任、可以引領自己道路的成年人，「所以我唔可以著得太潮、太 young (年輕)！」他搞笑地說。

隨性哲學四：心態決定境界

說到事業上的低潮期，Jason 坦承第一次傷聲帶及疫情時期是最迷失，那他自己又如何走過低谷呢？「其實都無話點樣 overcome (克服)，佢自自然然會……(消失)。喺我嘅角度，通常事業唔太好嘅時候，我嘅私人生活係比較豐富，可以去打波、湊女、照顧屋企，其實好開心㗎！當事業好嘅時候，私人生活就唔太好、唔太豐富，變咗只係不停工作，沒有 inspiration (靈感)。」

凡事換個角度，就能看出不同的風景。「隨性」是一種心態，或許正在谷底的你、迷茫的你，也可以嘗試抱著隨性的態度，按照自己心裡的想法面對人生，無論順逆都繼續前行！