久別重逢｜鄭伊健獲讚真正男神　陳卓賢恭喜羅淑佩升職：大家要相信佢嘅專業

電影《久別重逢》今晚（10日）舉行首映禮，一眾主演鄭伊健、陳卓賢（Ian）、許恩怡（Natalie）、蔡思韵與導演梁禮彥一同出席，現場不少年輕粉絲大叫「伊健哥哥」，蔡思韵又讚對方是真正的男神，伊健即時耍手擰頭否認。Ian現身公開活動即被問如何看「忠粉」羅淑佩升職做文體旅局長，Ian禮貌地祝賀，又指大家要相信對方的專業。

伊健與Ian首度合作，他們提到會為電影合唱一曲，Ian說：「我同伊健會合唱一曲，我哋錄音時有分別聽過對方唱嘅版本，因此要攞過平衡，final嘅版本我係未聽過。」伊健說：「最緊要係隻歌造出嚟，樂迷一聽隻歌，就諗返起電影嘅畫面，又或者未睇呢套戲就聽下集歌，齣戲十分特別，適合不同階層收看。」

Ian首次擔正做主角，飾演後生版伊健，片中Ian亦會穿校服，有網民將伊健的校服相比較，Ian先答：「大家畀面啫！最主要係導演覺得我仲可以勝任中學生就OK。」伊健就嚇親：「點解咁殘忍呀！過咗氣嘅嘢唔好再提。」被問到今次演出有機會獲提名明年金像獎最佳新演員，Ian說：「嘩！講到咁遠。自己當然無咁諗，只係純粹盡自己嘅努力去做好件事，後續票房有好成績，當然係值得開心，或者有獎項就當bonus。」Ian提到，最希望大家睇完可以了解電影本身背後想帶出的信息。

談到票房理想如何答謝影迷，伊健說要交給Ian處理。現場有不少年輕粉絲大叫「伊健哥哥」，他說：「今次同Ian合作十分開心，最重要是齣戲多些人觀看。」對於與另一新演員Natalie合作，伊健笑稱：「對住佢其實好攰，不過我哋有口德，唔信你問下Ian。」在旁的Ian附和說：「佢係好活潑，係片場好有positive嘅能量，感染晒成個片場，令到個氣氛好好。」Natalie直言伊健童心滿滿：「我以為我已經好hyper，但佢仲勁，同佢一齊係我會攰！」

Natalie大爆伊健在片場跳潮舞，伊健說：「我哋好認真㗎，唔會係片場亂玩。只係導演又要求高，所以係片場挑戰下網上流行嘅舞步，緩和一下現場氣氛。」兩位女角主動爆料，蔡思韵率先大讚伊健：「同佢合作就知道，真正嘅男神係歷久不衰！」害羞的伊健耍手擰頭否認，而Natalie則笑爆分享，有次埋位時與伊健偈傾，對方邊彈邊講：「D音好靚。」Natalie以為讚自己「啲陰好靚」，結果兩人爆笑。

對於著名Hellosss的羅淑佩最近升職「文化體育及旅遊局長」，Ian說：「首先喺到恭喜佢，相信佢係一位好專業嘅人士，佢工作嘅時候專業去工作，同埋希望大家唔好經常將佢私底下嘅興趣，同佢工作上嘅專業擺埋一齊傾。」