吳業坤苦練空手道4年　首出賽即奪冠：咬實牙關打落去

歌手吳業坤熱愛日本文化，更娶埋日籍太太濱口愛子（吳愛子），齊齊定居香港，不過佢對日本文化嘅心不變，尋日（28日）佢同大家報喜，原來苦練4年空手道嘅佢，首次參賽即奪冠！

吳業坤發文提到自己2020年開始學空手道，更曾到日本深造，笑言獲師傅「愛的鞭策」嘅佢，日前首次參加「第十三回親善空手道選手權大會」即得獎，仲要係冠軍，認真威威：「🥋2020年5月第一次接觸空手道 加埋有一年嘅空白期去咗外地工作 練習咗差唔多四年 今日第一次參加組手比賽 拎到冠軍好開心🥹🥹🏆🥹🥹（人生對上一次拎冠軍好似係中五嘅推鉛球金牌）我會繼續努力！！！！多謝師傅嘅愛的鞭策！今次明白咗 無論幾攰都好唔好展露出嚟 咬實牙關都要打埋落去直至完場 歡迎一齊變得更強大」賽後佢獲愛子為佢炮製愛心餐，漢堡扒上插咗愛子自己親手寫嘅打氣字句，用美食祝賀老公。

東網網站 : https://on.cc/東網Facebook專頁 : https://www.facebook.com/onccnews/