「小薯茄」男團FINALLY去年成軍，上月推出首支跳唱單曲〈終於出歌〉後，昨晚（15日）更踩上台板於灣仔藝術中心壽臣劇院舉行一連13場的舞台劇《FINALLY OK》，頭場舞台劇更如願獲「終粉」（FINALLY粉絲團暱稱）「掟胸圍」到台上，十分瘋狂！
舞台劇《FINALLY OK》開賣後火速售罄，頭場舞台劇全場爆滿，四位成員包括第一隊長Chorus（程人富）、第二隊長JPG（阿J）、第三隊長Fatman（肥蚊）和隊員M.I.C（朱Mic）一開場便化身「ChiSinBBes（痴線BB）」，以「天線得得B」造型登場，並與「反Nally」的「小薯茄」成員吳冰（阿冰）所扮演的「太陽」互串鬥嘴，大放笑彈。
舞台劇由多個小故事組成，五位演員（FINALLY和阿冰）於劇中一人分飾多個角色，於不同情景下，分別以Talk Show、唱歌及跳舞來說「FINALLY都會OK」的故事，展現 FINALLY 的正能量精神！他們希望觀眾從劇中有所領略，即使面對困境、迷失方向、甚至是世界末日，只要有FINALLY，或者只要能像FINALLY，就會 FINALLY OK！
謝幕時，程人富大聲高呼「WOW！」，又笑嘆：「都仲未畀食叉雞飯住！」然後便邀請小薯茄老闆高Ling上台，高Ling致謝時更一度哽咽落淚，場面感動，程人富亦感觸表示：「聽到大家嘅掌聲同笑聲，平日排練幾咁辛苦都係值得㗎！」。阿冰：「頭場好開心觀眾咁有反應，雖然仲有改善空間，但觀眾嘅笑聲畀到好大信心，我會努力喺嚟緊12場做得更好！」
肥蚊又指：「好開心終於可以見到觀眾！大家嘅掌聲笑聲就係我哋FINALLY OK團隊最好嘅Good show gift。」阿J興奮表示：「上台前本身好緊張，但係見到觀眾們反而就淡定咗，心情好興奮同開心。聽到觀眾嘅笑聲，就覺得呢兩個月排練好值得。會繼續努力，盡力做爆每一場！」朱Mic感觸分享：「好興奮，好開心！希望會愈來愈好！謝幕時清楚看見觀眾，覺得很感動，為我打下強心針！」
完場前一眾「終粉」狂呼「FINALLY」的名字，以及做出FINALLY招牌手勢以示支持，更有「終粉」向FINALLY「掟胸圍」，十分瘋狂！
