近年提起香港的士服務質素，不少人都會聯想起拒載、揀客、兜路、態度惡劣、只收現金、收零頭尾數、開天殺價等。方皓玟昨日（3月3日）在街上目擊一名的士司機狂鬧內地女遊客，事源對方沒有帶現金在身，要等朋友來代付車資。方皓玟於是代該名遊客付50元的士費，直言「使唔使擘大喉嚨咁鬧人，香港人嘅待客之道就係咁樣嗎？」、「我睇你唔順眼」。
方皓玟昨晚在社交平台出帖文寫道：「今日幫一位內地女遊客俾咗$50的士費。原因係因為她沒帶現金喺身，個的士司機，不停鬧佢，我真係睇唔過眼，人哋已經叫緊朋友攞錢嚟俾佢，叫你等一陣，使唔使擘大喉嚨咁鬧人，香港人嘅待客之道就係咁樣嗎？希望真係只得你係咁。如果個個都係咁，呢個城市有點可悲。又不是得罪你，只係遲少少俾錢。真的咁大問題嗎？」
方皓玟直言睇的士司機「唔順眼」：「我見到就扯火。最激氣嘅係，當我行過去俾錢個司機嘅時候，佢問我你係佢朋友咩？點解要幫佢？我就覺得呢個人心地真的很差。我話，我唔係佢朋友，但我睇你唔順眼。」
另外，方皓玟今日在社交平台上載短片，提到沒想過「今時今日我會上連登」，又指自己做單親媽媽「是愉快」，「都唔知啲人點解要攻擊我離婚」、「唔離婚一路到尾先係少數，嗰啲少數嘅人點解要鬧我哋呢啲多數嘅人呢？」。近年方皓玟不時被指太瘦，更被懷疑患上厭食症，她直言：「我食到隻積咁，點樣厭食症呀？一個人係咪唔可以食極唔肥呢？」、「有家族遺傳呢家嘢，你冇理由針對人哋個genes」。
方皓玟又提到之前現身TVB節目中演唱：「有段時間我去某啲平台唱歌，脫粉」、「我覺得脫得精彩、脫得俐落，如果大家走得開心咪走囉，最緊要有得揀。」