要令心儀嘅男生愛上你，得個講字係無用，梗係行動最實際！約會之前當然要做功課，唔係叫你去起底（雖然你都可以），快啲學識呢8個調情身體語言去吸引你心儀嘅男生吧！
1.身體微微傾前
尤其是係面對面坐喺度傾計嘅時候，身體微微傾前係代表你對對方講嘅嘢感興趣。
2.眼神接觸
正所謂眼睛係「靈魂之窗」，所以眼神接觸係十分之重要。當對方講嘢嘅時候，唔好掛住㩒手機或者食嘢，記住時不時望住佢雙眼，然後留心聽佢講。
3.甜蜜微笑
笑容係最好嘅化妝品，鍾意笑嘅女仔感覺上都比較開朗同平易近人，正正就係普遍男生認為girlfrien-able嘅女生特點。
4.模仿對方行為
有研究指出，鏡子效應係戀人或者朋友間經常會出現嘅自然現象，所以故意模仿對方動作可以產生潛意識上嘅影響，令對方覺得同你更親近。例如當佢攞起水杯飲水時你可以接著模仿，飲水，整頭髮，放低餐具呢啲小動作模仿時都會幾自然。
5.走在他左邊
左邊身體係由右腦控制，所以走在他左邊再輕輕說話，可以刺激右腦，而右腦就正正係處理情緒同美感，會更容易觸動佢嘅情感。
6.善用香味
嗅覺記憶比視覺記憶更長更深刻，所以記住好好利用香水，令你喺約會時散發著你嘅標誌香味。當佢喺其他地方聞到同一種香味時，就自不然會想起你！
7.適當地傻笑
笑聲嘅感染力其實比你想像中高，好多時你見到對方傻笑，就會好自然咁跟住笑，所以適當地傻笑都係好好嘅調情身體語言之一。
8.不經意身體接觸
當你做齊晒上面7點，記住要加埋不經意身體接觸，好似搭膊頭、輕輕拍打對方手臂，甚至摸頭同搣面珠墩，好感度即刻提升！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**