疫症期間不少人都與外賣為伴,而外賣嚟講,最穩陣一定係快餐店同茶記,通常就算凍咗少少,質素都唔會差太遠,同埋價錢實惠,即使冇堂食咁好味都冇咁肉赤。之但係食嚟食去都係嗰幾樣總會厭,偶爾想食好啲,其實亦有唔少中價餐廳有做外賣兼優惠,而貼心嘅CONY今次就為大家實試將軍澳區幾個連鎖餐飲品牌,睇下佢哋招牌菜嘅外賣質素如何!
外賣薄餅繼續相機食先
Pizza係其中一款熱門外賣之選,而擁有4間分店的本地意菜品牌「The Point - Pizza & Pasta」以超IGable的「龍蝦薄餅」為人熟悉。今次CONY都嗌咗招牌pizza,估唔到變成外賣嘅模樣都可以「相機食先」。
龍蝦薄餅的造型之所以上鏡,係因為薄餅上放上原隻龍蝦,而大家都知pizza盒扁平,所以龍蝦分開以另一個盒盛載,更方便運送之餘,薄餅打開蓋時亦唔會感覺亂糟糟,而送到時好似CONY咁將龍蝦放上pizza再相機食先又得,就咁開餐亦得。
至於味道方面,送到時pizza微暖,拉絲效果會較弱,但因為薄餅足料,鋪有滿滿龍蝦、水牛芝士和車厘茄等,再塗上海鮮汁,食起來依然鮮味。因為pizza太大食唔晒關係,CONY第二日將食剩pizza放在平底鑊上輕輕烘熱,發現批底會變得更加香脆,卻又不影響薄餅餡料的質素,唔嫌煩嘅各位可以選擇先翻熱會更美味。
The Point - Pizza & Pasta
地址:將軍澳唐德街9號將軍澳中心G01 & G02舖
電話:2799 8801
✓網上外送平台
✓外賣自取85折
特色小籠包美味秘訣
來自新加坡的京川滬菜「樂天皇朝」現時擁有5間分店,其中招牌「八色小籠包」最廣為人知,不過小籠包凍咗會唔好食,到底餐廳會點解決呢個外送問題?
小籠包外送到家時嘅賣相與堂食相差無幾,而餐廳用咗一個適合放入微波爐或蒸爐嘅食物盒盛載,建議大家食之前簡單翻熱,盒上仲貼上微波爐翻熱方法。因為小籠包送到時仲微暖,CONY無翻熱照食,外皮會稍乾,但餡料味道差不多,而翻熱後的小籠包當然好食啲,因為外皮變返濕潤,口感和味道同喺餐廳食差唔多。
除咗多款外送美食,餐廳又特意為疫情推出多款價錢相宜的「香港便當」,集合1款主菜、2款配菜、1款點心和炒飯,十分豐富,而且菜式都係適合外送嘅款式,方便運送之餘,味道亦唔會因為凍咗而影響太多。不過要留意,便當只供外賣自取。
樂天皇朝
地址:將軍澳唐德街9號將軍澳中心地下G31號舖
電話:2217 7770
✓網上外送平台
✓外賣自取8折(不包括飲品酒水及便當)
外賣鰻魚飯更抵食
日本備長炭燒鰻魚飯專門店「名代宇奈とと」以性價比高見稱,來港約一年多就迅速開設咗5間分店。現時餐廳推出外賣折扣,白飯仲可以免費加大。
CONY今次試咗招牌「雙層鰻魚丼」,外賣到家時嘅飯盒仲相當溫暖,唔知係外賣盒保溫力強定係白飯盛得滿滿而增強保溫,影完相面層嘅鰻魚凍咗少少,但白飯仲暖。而且因為鰻魚肉身夠厚,油脂豐富,食落仲好香,肉質亦細滑。至於白飯雖然有滿滿鰻魚汁,但冇浸到變淋身。外賣有折而且質素keep到,變相抵食咗!
名代宇奈とと
地址:將軍澳坑口重華路8號東港城1樓196&197A號舖
電話:3974 5708
✓網上外送平台
✓外賣自取:會員8折;非會員85折,晚上8點前兼享飲品買一送一
意大利飯原來都係穩陣之選?
另一間主打甜品和飲料嘅「Say Cheese」,有分店以café形式經營,而顧名思義,以芝士做主題,當中主打「火焰卡邦尼意粉」,喺原隻帕爾瑪芝士上火焰烹調,不過因為經外送後嘅芝士會冇咁好食,店員都唔係咁推薦,所以CONY改為試佢另外兩款招牌菜「三重芝士虎蝦紅花意大利飯」及「香草烤雞」。
餐廳將食物包裝得唔錯,意大利飯和燒雞外送到家後唔會散晒搞到冇胃口。而兩道菜嘅份量都充足,意大利飯嘅芝士味香濃,而且硬度適中,係外賣嚟講幾穩陣嘅食品。至於烤雞的外皮一定冇堂食咁香脆,但裡面嘅肉汁都keep到,而且配埋燒烤醬同食就更能保持濕潤質感。
將軍澳中心 Say Cheese (西式)
地址:將軍澳唐德街9號將軍澳中心173舖
電話:2343 0868
✓網上外送平台
✓外賣免加一