【囡囡剛出世】陳柏宇做爸爸 太太Leanne爆﹕老公喊得好勁

【新增內容、圖片】

陳柏宇（Jason）今年4月開心宣佈與太太符曉薇(Leanne)成功懷孕，今日BB終於出世喇！Jason喺ig貼上一家三口合照，BB女眼仔都未開，Jason留言﹕「我一見到佢就忍唔住喊。Abigail, i choose u!!! (throws out pokeball)」。

剛為人母嘅Leanne樣子顯得好精神，笑得勁開心。佢今日接受《蘋果》電話訪問時透露係剖腹誕女，佢話﹕「Thanks,啱啱生完，好興奮同感動，我都未知BB幾重，因為我剛啱出手術室。」Leanne透露比預產期提早兩星期出世，有冇感動到喊？佢話﹕「有呀，老公喊得仲勁。但我出院嗰日，老公要返大陸演唱會，o依家要搵朋友陪出院。」

小公主搶閘出世，打亂了父母計劃，Leanne說：「因為我本身預產期係18、19號，本身book咗10月10日生嘅，估唔到昨日燒完嘢食，今朝就穿羊水要生啦。」由於剖腹關係，所以Leanne話生產過程唔痛。問到老公有冇剪臍帶？Leanne踢爆：「佢唔夠膽！」

初為人父嘅陳柏宇接受《蘋果》電話訪問透露BB重5.2磅：「好開心、好感動、好激動！一見到bb我就喊！佢好得意，我望住佢好唔想放手，跟住佢要上BB房，我都想陪埋BB上去，但老婆想我陪佢，依家等緊BB體溫暖啲，就可以再見佢啦！」

小公主出世短短半日，Jason用寶貝女英文名Abigail開ig，火速po咗一張相同一條短片，片中嘅Jason不停摸囡囡，騷擾BB瞓覺，又忍唔住錫咗囡囡一啖，仲用拳頭放在囡囡面旁比大細，十分搞笑。

精選娛聞，喺晒《娛果》 http://fb.com/appledailyent